SQO-da qylmystyq top 1,4 mlrd teńgeniń jalǵan shot-faktýralaryn jasaǵan

NUR-SULTAN. QazAqparat – Soltústik Qazaqstan oblysynda jalǵan shot-faktýralar jasaýmen aınalysyp kelgen qylmystyq top quryqtaldy, dep habarlaıdy QazAqparat QR qarjy monıtorıngi agenttiginiń baspasóz qyzmetine silteme jasap.

Baspasóz qyzmetiniń málimetterine qaraǵanda, ekinshi deńgeıli bankterdiń qarajatyn júıeli túrde qolma-qol aqshaǵa aınaldyrýmen aınalysyp kelgen topty Qarjylyq monıtorıng agenttiginiń Soltústik Qazaqstan oblysy boıynsha aýmaqtyq departamenti anyqtaǵan.

2018-2020 jyldar aralyǵynda áreket etken qylmystyq topty Petropavl qalasynyń turǵyny uıymdastyryp, basqarǵan. Qylmystyq toptyń maqsaty kommertsııalyq uıymdardyń salyqtan jaltarýyna kómektesý. Osy maqsatta qylmystyq top baqylaýyndaǵy kommertsııalyq kompanııalar arqyly jalpy somasy shamamen 1,4 mlrd. teńgeniń shot-faktýralar jasaǵan.

«Sot úkimimen qylmysty uıymdastyrýshy kináli dep tanylyp, múlki tárkilenip, 7 jyl 6 aıǵa bas bostandyǵynan aıyryldy. Uıymdasqan qylmystyq top músheleri múlki tárkilenip, 5 jáne 6 jylǵa bas bostandyǵynan aıyryldy. Oblystyq sottyń qylmystyq ister jónindegi sot alqasy Petropavl qalalyq sotynyń úkimin ózgerissiz qaldyrdy»,-delingen habarlamada.