SQO-da qylmystyq ister elektrondy formatqa kóshirilip jatyr
PETROPAVL. QazAqparat - Soltústik Qazaqstan oblysynda polıtseıler ákimshilik jáne qylmystyq isterdi tsıfrlyq formatqa kóshirýde, dep habarlaıdy QazAqparat tilshisi.
Polıtsııa departamenti baspasóz qyzmetiniń aqparatyna súıensek, 73 tergeýshi jáne anyqtaýshynyń jumys orny elektrondy qylmystyq isterdi júrgizýge saı jabdyqtalǵan. Jyl basynan beri «E-qylmystyq isterdiń» 428-i tirkelip, 409-y aıaqtalǵan.
Polıtseılerdiń aıtýynsha, qaǵazdan arylý tergeýge ketetin ýaqytty únemdeýge septigin tıgizgen. Tergeýdiń árbir bóligi qadaǵalaýshy organdarǵa aıqyn kórinetin boldy. Tergeýshi jumystan bir mınýtqa da aýytqymaý múmkindigin aldy. Advokattar, jábirlenýshiler, kúdiktiler de tergeýdiń barysymen tanysa alatyn boldy.
«Barynsha ashyq jumys isteý - adamdardyń tártip saqtaý organdaryna degen senimin arttyrýǵa aparar jol. Patrýldik polıtsııany Ákimshilik óndiristerdiń biryńǵaı tiziliminde qashyqtyqtan jumys isteý múmkindigin beretin planshettermen jabdyqtaý da osyndaı mindetti atqarady. Hattamalardy planshet arqyly qaraý zańsyz jolmen «kelisip kete berýge» jol bermeıdi», - deıdi polıtsııa departamentiniń bastyǵy Berik Bilálov.
Qazir tártip saqshylarynyń qolynda 89 planshet bar, jýyrda taǵy 127-si satyp alynady. Aldaǵy ýaqytta patrýlderdiń bárin qajetti tehnıkamen túgel jabdyqtaý josparlanyp otyr.
B. Bilálovtiń aıtýynsha, ashyqtyq pen jarııalylyqty memlekettik qyzmetterdi kórsetý salasyn elektrondy formatqa kóshirý de septigin tıgizedi. Byltyr birinshi toqsanda «Elektrondy úkimet» portalyna turǵylyqty mekenjaıy boıynsha nebári 78 adam tirkelgen. Bıyl kompıýter nemese mobıldi qurylǵy arqyly tirkelgenderdiń sany 984-ke jetti.
«Joǵary tehnologııalar - polıtsııa jumysynyń nátıjeliligin arttyrýǵa kóp kómek beredi. Óńirde qalalyq jáne aýdandyq polıtsııa bólimderiniń barlyǵy jaıly front-keńselermen qamtamasyz etilgen», - deıdi B. Bilálov.
Avtor: Olesıa Jýkoven
