SQO-da qydyrympaz basshy qyzmetinen bosatylady (FOTO)
PETROPAVL - 27 maýsymda Memlekettik qyzmet isteri mınıstrligi SQO boıynsha departamentiniń basshysy - Ádep jónindegi keńestiń tóraǵasy Ǵalym Sultanuly Tursynbaevtyń tóraǵalyǵymen ótken keńestiń kezekti otyrysynda 8 másele qaraldy.
Eń aldymen keńestiń jańa múshesi «Qazaqstan» teleradıokorporatsııasy» AQ SQO fılıalynyń dırektory E.Toqshylyq tanystyryldy.
Sodan soń máselelerdi qarastyrýǵa kirisken keńes quramy sybaılas jemqorlyq profılaktıkasy basqarmasynyń SQO Qorǵanys isteri departamentiniń qyzmetine júrgizgen, sybaılas jemqorlyq táýekelderin taldaý qorytyndysy týraly aqparatyn tyńdap, jemqorlyqqa qarsylyq tanytý jónindegi sharalardy kúsheıtý qajettigin aıtty.
Aýdan ákimdiginiń qabyrǵasyndaǵy qyzmettik tártipti kúsheıtý, sybaılas jemqorlyqtyń jáne memlekettik qyzmetke kir keltiretin teris qylyqtardyń aldyn alý sharalary jóninde Taıynsha aýdany ákiminiń aqparaty tyńdaldy.
Baıandama qorytyndysy boıynsha barlyq olqylyqtar eskerilip, aýdan basshysyna qyzmetkerleriniń quqyqtyq saýatyn arttyrý jáne zańnamany minsiz saqtaný jóninde usynys jasaldy.
Jergilikti atqarýshy organdardyń memlekettik qyzmetshileri arasyndaǵy quqyq buzýshylyqtardyń aldyn alý jóninde atqarǵan jumysy týraly oblys ákimdiginiń Ádep jónindegi ýákiletti ókili ıÝ. Naýmochkın esep berdi.
Budan ári BAQ-taǵy synı jarııalanymdar, azamattardyń aryzdary jáne memlekettik organnyń usynymy boıynsha qozǵalǵan 4 tártiptik is qaraldy.
Alǵashqysy QR AShM Memlekettik ınspektsııa komıteti Aıyrtaý aýdany boıynsha aýmaqtyq ınspektsııasynyń basshysyna qatysty boldy.
Qatarynan úsh kún boıy, úsh saǵattan artyq dáleldi sebeptersiz qyzmet ornynda otyrmaǵan memlekettik qyzmetshini, tártipke baǵynbaı Ádep kodeksiniń talaptaryn buzdy dep oblystyq ınspektsııa usynym jasaǵan bolatyn. Júrgizilgen tekseris nátıjesinde óreskel tártip buzýshylyq faktisi rastaldy. Sondyqtan Ádep jónindegi keńes qydyrympaz basshyny qyzmetinen bosatý jóninde usynym jasady.
Aıyrtaý aýdany veterınarııa bóliminiń jetekshisi bolsa, aýdannyń Veterınarlyq stansasy dırektorynyń laýazymyna tıisti biliktilik talaptaryna saı kelmeıtin tulǵany konkýrs protsedýralaryn ótkizýsiz qabyldaý týraly zańsyz sheshim qabyldaǵan. Zańsyz artyqshylyq tanytyp, memlekettik qyzmetke teris áreketimen kir keltirgen bólim basshysy, atqaryp otyrǵan qyzmetine tolyq saı emestigi týraly eskertý aldy.
BAQ-taǵy synı jarııalanymdar boıynsha júrgizilgen tekseristiń qorytyndysy boıynsha Petropavl qalalyq Mádenıet jáne tilderdi damytý bóliminiń basshysy A.Beısenovanyń qalalyq Mádenıet úıi dırektorynyń laýazymyna talaptarǵa saı kelmeıtin tulǵany ýaqytsha ornalastyrǵandyǵy anyqtaldy.
Sondyqtan Ádep jónindegi keńes músheleri, bir aýyzdan A.M. Beısenovaǵa qatań sógis jarııalaýdy sheshti.
Eń sońǵy bolyp Shal aqyn aýdanynyń ákimine qatysty tártiptik is qaraldy.
Buǵan, ákiminiń halyq aldynda esep berýi kezinde kórsetken dórekiligine tózbegen, Sýhorabov aýyldyq okrýgi turǵynynyń shaǵymy negiz boldy.
Keńes tóraǵasy Ǵalym Tursynbaev aýdan ákimin eskertý túrinde tártiptik jaýapkershilikke tartý qajet degen usynys jasady.
Daýys berý kezinde Tóraǵanyń usynysyn Keńestiń 3 múshesi qoldap, beseýi qarsylyq bildirdi. Daýystardyń basymdylyǵyna baılanysty tártiptik isti toqtatý jóninde sheshim qabyldandy.
