SQO-da KVI juqtyrǵan 195 júkti áıeldi merziminen buryn bosandyrýǵa týra keldi

PETROPAVL. QazAqparat – Soltústik Qazaqstan oblysynda koronavırýs juqtyrǵan 10 júkti áıel dárigerlerdiń baqylaýyna alynǵan, ekeýiniń jaǵdaıy aýyr, dep habarlaıdy QazAqparat tilshisi.

SQO ákimdiginiń otyrysynda densaýlyq saqtaý basqarmasy basshysynyń mindetin atqarýshy Nurlan Aımanov indet bastalǵaly 195 áıeldi merziminen buryn bosandyrýǵa týra kelgenin aıtty. 123 sábıdiń jaǵdaıy jaqsy bolǵan, 72 sábı shala týǵan. Úsh shaqalaq shetinedi. Sondaı-aq KVI juqtyrǵan jańa bosanǵan ana da qaıtys boldy.

Jalpy indet bastalǵaly SQO-da 660 júkti áıel koronavırýs juqtyrǵan, olardyń 650-i táýir boldy. Qazir 10 áıel dárigerlerdiń baqylaýynda, ekeýi statsıonarda em alyp jatyr.

«Jeltoqsan aıynda balalar arasynda da koronavırýsty juqtyrý jaǵdaılary azaıdy, 54 %-ǵa qysqarǵan. 20 qarashada 156 bala dáriger baqylaýynda bolsa, qazir olardyń sany – 69. Ótken jylmen salystyrǵanda balalar jıi aýyratyn bolǵan. Buryn aýrý belgileri bolmasa, qazir olarda da dene qyzýy kóteriledi, demikpe paıda bolady», - deıdi Nurlan Aımanov.

SQO-da COVID-19-dan qaıtys bolǵandar sany 400-den asyp ketti. Sońǵy bes aıda 375 adam aýyryp kóz jumǵan.

«Іndet bastalǵannan 15 shildege deıin 43 adam qaıtys bolsa, delta shtamynyń áserinen keıin bul kórsetkish kúrt artty. Kóz jumǵandardyń 19-y vaktsınatsııa kýrsynan tolyq ótken. Olardyń aýyr ilespe aýrýlary bolǵan», - deıdi Nurlan Aımanov.

Buǵan deıin «Omıkron» tirkelgen elderden kelgen 37 soltústikqazaqstandyqtyń úı karantıninde otyrǵanyn aıtqan edik.