SQO-da KVI-ge qarsy vaktsına egý úshin qosymsha taǵy eki pýnkt ashyldy
PETROPAVL. QazAqparat – Soltústik Qazaqstan oblysynda bir táýlikte 235 adamǵa koronavırýsqa qarsy vaktsına egildi, dep habarlaıdy QazAqparat tilshisi.
SQO densaýlyq saqtaý basqarmasynyń málimetinshe, óńirde bir táýlikte 235 adamǵa koronavırýsqa qarsy vaktsına egildi. Ár ekpe egý pýnktinde bir kúnde orta eseppen 40-50 adam vaktsına alyp jatyr. Naýqandy sáti aıaqtaý úshin Petropavlda qosymsha taǵy eki ekpe egetin oryn ashyldy.
«Vaktsına egý pýnktteri qazir 13 aýdan ortalyǵynda jáne 6-ýy Petropavlda jumys istep jatyr. Onyń ekeýi keshe tústen keıin ashyldy. Bireýi ftızıopýlmonologııa ortalyǵynda, ekinshisi oblystyq kópbeıindi aýrýhanada ornalasqan», - deıdi SQO densaýlyq saqtaý basqarmasynyń baspasóz hatshysy Gúlnar Saılaýqyzy.
Birinshi kezekte vaktsınany koronavırýs ınfektsııasyn juqtyrǵandarmen tikeleı jumys isteıtin medıtsına qyzmetkerleri alyp jatyr.
«Óte jaqsy uıymdastyrylǵan. Meni aldymen terapevt qarap, jaǵdaıymdy tekserdi, suraqtaryn qoıdy. Tek soan keıin ǵana egilýge ruqsatyn berdi. Keshe áriptesterim aldy. Olardyń keıbirinde azdap dene qyzýy kóterildi. Sondaı-aq ıne pisken jer qyzaryp, qyshýy múmkin. Bul adam aǵzasynyń ekpege qalypty reaktsııasy. Vaktsına egilgenderge qoldaryna jadynama berilip jatyr. Onda barlyǵy aıtylǵan, sondaı-aq dárigerdiń telefon nómiri kórsetilgen», - deıdi 3-qalalyq emhanaǵa vaktsına alýǵa kelgen Petropavl qalalyq kópbeıindi aýrýhana bas dárigeriniń orynbasary Rýslan Tasov.
Dárigerdiń aıtýynsha, óńirde KVI boıynsha jaǵdaı kúrdeli. Sondaı-aq ol eńbek etetin qalalyq kópbeıindi aýrýhanada ınfektsııalyq statsıonar ornalasqan.
«Vaktsına alǵannan keıin adamda ımmýnıtet paıda bolady. Ol vırýsty juqtyrsa da aýrý jeńil ótedi. Biz únemi syrqattarmen baılanystamyz. Qorǵanǵanymyzben juqtyryp alýymyz ábden múmkin. Búgin bizdiń aýrýhanadan 50 adam keldik. Olardyń barlyǵy ınfektsııalyq statsıonarda eńbek etetinder», - deıdi Rýslan Tasov.
Buǵan deıin SQO-ǵa 1 200 doza vaktsınanyń jetkizilgenin aıtqan edik.
Alǵashqylardyń biri bolyp densaýlyq saqtaý basqarmasy basshysynyń orynbasary Nurlan Aımanov ta ekpe aldy.
