SQO-da KVI-diń kóbeıýine baılanysty statsıonarlarda oryn sany kóbeıtildi
SQO densaýlyq saqtaý basqarmasy basshysynyń orynbasary Nurlan Aımanovtyń aıtýynsha, búgingi tańda óńirde koronavırýsqa qatysty jaǵdaı kúrdeli. Statsıonarlarǵa kúndelikti 100 adamnan túsip jatyr.
«Osyǵan oraı aýyrǵandarǵa arnalǵan oryn sanyn 1755-ke deıin kóbeıttik. Qazirgi tańda emdeý mekemelerinde 793 syrqat bar. Sonyń ishinde 60 syrqattyń jaǵdaıy aýyr, 51-i jansaqtaý bólimshelerinde jatyr. 18 adam qarqyndy terapııa palatalarynda emdelýde. 400-den astam adam ottegige táýeldi, onsyz dem ala almaıdy, apparattarda jatyr. Búginde satýratsııasy tómen, entigip, ıntoksıkatsııasy bar naýqastardy ǵana qabyldap, jatqyzyp jatyrmyz. Jazylyp shyǵatyndar sany 40-50-den aspaıdy, óıtkeni ózdiginen demala almaǵandyqtan syrqattardy shyǵara almaımyz, - deıdi Nurlan Aımanov.
Mamannyń aıtýynsha, naýqastardyń 93 %-dan astamy – ekpe almaǵandar, sondaı-aq basym bóligi egde jastaǵy adamdar. Kópshiliginiń ilespe aýrýlary bar.
«Qazirgi ýaqytta bos oryndar bar, óıtkeni barlyq aýdandarda ınfektsııalyq statsıonarlardy ashtyq. Jedel járdem qyzmeti kúsheıtilgen rejımde jumys istep jatyr. 1 300-den astam adam ambýlatorııada dárigerlerdiń baqylaýyna alynǵan. Koronavırýs juqtyrǵan 7 júkti áıel statsıonarda, taǵy 10-y úıde em alyp jatyr. Balalar aýrýhanasyna 15 bala jatqyzylsa, 239-y ambýlatorııada em alýda», - deıdi Nurlan Aımanov.
Jalpy sońǵy eki aptada 69 mekteptiń 120 synyby qashyqtan oqýǵa jiberildi. Karantınge jabylǵan mektepter joq. Jańa oqý jyly bastalǵaly COVID-19-ben 717 oqýshy aýyrǵan. Onyń 56-sy ǵana qaýipti ınfektsııany mektepte juqtyrǵan.