SQO-da kvazımemlekettik sektorǵa jemqorlyqqa qarsy halyqaralyq standartty engizý josparlanǵan

PETROPAVL. QazAqparat – Soltústik Qazaqstan oblysynda kvazımemlekettik sektor sýbektileriniń ókilderi úshin sybaılas jemqorlyqqa qarsy qyzmet semınar-keńes uıymdastyrdy, negizgi taqyryp – aldaǵy jumys josparlary, dep habarlaıdy QazAqparat tilshisi.

SQO sybaılas jemqorlyqqa qarsy qyzmettiń málimetinshe, semınar-keńeske qyzmetkerleriniń sany 400-den asatyn óńirdegi iri kásiporyndardyń basshylary men kompleans ofıtserleri qatysty. Kóptiń talqysyna túsken másele - kvazımemlekettik sektorǵa ISO: 37001 halyqaralyq sybaılas jemqorlyqqa qarsy standartyn jáne sybaılas jemqorlyqqa qarsy komplaens ınstıtýtyn engizý. Sondaı-aq sybaılas jemqorlyqqa qarsy is-qımyl jónindegi aldaǵy jumys josparlary qaraldy.

QR Sybaılas jemqorlyqqa qarsy is-qımyl agenttiginiń SQO boıynsha departamenti jetekshisiniń birinshi orynbasary Nurlan Jahınniń aıtýynsha, ótkiziletin is-sharalardyń sandyq kórsetkishinen onyń sapaly oryndalýyna kóshý qarastyrylǵan. Osyǵan baılanysty sybaılas jemqorlyqqa qarsy qyzmet olardy uıymdastyrýda tolyq ádistemelik qoldaý kórsetedi.

Qazirgi ýaqytta komplaens-qyzmet SQO-nyń kvazımemlekettik sektorynyń 61 uıymyna engizildi.

Keńeske «Protecting Business and Investments» jobasyna qatysatyn bıznes ókilderi qatysyp, sybaılas jemqorlyqqa qarsy is-qımyl boıynsha atqarylǵan jumystyń nátıjelerimen bólisti.