SQO-da qutqarýshylardyń alǵashqy toby sý tasqyny bolýy múmkin aýdanǵa kómekke attandy
PETROPAVL. QazAqparat – Soltústik Qazaqstan oblysynda Tótenshe jaǵdaılar departamentiniń arnaıy toby Ǵabıt Músirepov aýdanyna sý tasqynynyń aldyn alý úshin attandy, dep habarlaıdy QazAqparat tilshisi.
SQO TJD bastyǵynyń orynbasary Murat Qanǵojınovtyń aıtýynsha, sý tasqynymen kúres tobyna jeke quramnan 23 adam kirgen, sondaı-aq jol talǵamaıtyn kólikter men júzý quraldary jiberildi.
«Mundaı is-shara dástúrli, oblystyń sý tasqyny bolýy múmkin qaýipti aımaqtaryna osylaı qutqarý tobyn jasaqtap jiberemiz. Jalpy departament 9 top qurdy. Birinshi top Ǵ.Músirepov atyndaǵy aýdanǵa attandy. Qalǵandaryn jaǵdaıǵa baılanysty jiberemiz. Kezekte Tımırıazev jáne Aıyrtaý aýdandary tur. Kóktemgi sý tasqynyna qatysty jaǵdaıdy únemi nazarda ustap otyrmyz», - deıdi Murat Qanǵojınov.
Departament bastyǵy orynbasarynyń aıtýynsha, búgin 27 naýryzda Ǵ.Músirepov jáne Aıyrtaý aýdandarynda sý qoımalarynda muzdy jarý jumystary júrgiziledi. Ózenderdiń saǵasy tazartylyp, qardyń eldi mekenderden shyǵarylýy, kóshe-aýlalardan sýdyń sorylýy baqylaýda bolady.
Buǵan deıin SQO-da 1,5 myńǵa jýyq turǵyny bar 42 eldi mekendi sý basý qaýpi bar ekenin aıtqan edik. Jalpy óńirde 6 myńnan astam turǵyny bar 85 eldi meken kóktemgi sý tasqynynda zardap shegýi múmkin. Onyń 30-y ózen deńgeıiniń kóterilýinen, 13-i kólder sýynyń tasýynan, 42-si erigen qar sýynan zardap shegýi múmkin.
