SQO-da qutqarýshylar sý tasqynyna ázirlik jaıyn pysyqtady
PETROPAVL. QazAqparat – Soltústik Qazaqstan oblysynda tótenshe jaǵdaılar departamentiniń sý tasqynyna ázirligin baıqaý maqsatynda apattyq-qutqarý bólimderiniń kúshi men quralynyń daıyndyq kórsetilimi uıymdastyryldy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, bıyl kóktemde bolýy múmkin sý tasqynymen kúresý jáne tótenshe jaǵdaıdyń aldyn alý maqsatynda tehnıkalardyń, qondyrǵylar men qurylǵylardyń jaǵdaıy men talapqa saı bolýyna basa nazar aýdaryldy.
«Búgin kóktemgi sý tasqyny bola qalǵan jaǵdaıda jumys isteıtin bólimshelerdiń ázirligi tekserildi. Jalpy bul jumystarǵa qajet bolǵan jaǵdaıda 264 adam, 50 tehnıka, 70-ten astam sý sorǵyshtar men motopompalar jáne kez-kelgen ýaqytta kómek kórsetýge ázir 8 júzý quraly daıyn», - dedi SQO TJD bastyǵynyń orynbasary Erik Sarybaev.
Oblys aýmaǵynda tasqyn sý kúsheıgen jaǵdaıda óńirde dıslokatsııalanǵan Ulttyq Ulan bólimshelerinen 60 adam men 4 arnaıy tehnıka, oblystyq polıtsııa departamentinen 160 adam men 100 tehnıka halyqqa kómekke keledi. Budan basqa QR ІІM Tótenshe jaǵdaılar boıynsha Komıtettiń jeke jospary boıynsha óńirge kórshi oblystardan qosymsha kúsh pen qural jumyldyrylady.
Mamandardyń esebinshe, SQO-da kóktemde sý basý qaýpi joǵary 90-nan astam eldi meken bar.
