SQO-da qutqarýshylar sý basýy múmkin aýdandarda jumys jasaýda
PETROPAVL. QazAqparat - SQO-da bıyl 90-nan astam eldimekendi sý basý qaýpi bar. Tasqyn sýdyń aldyn alý úshin óńirde birqatar sharalar qolǵa alyndy, dep habarlaıdy QazAqparat tilshisi.
Petropavl qalasynan qys boıy 600 myń tekshe metr qar shyǵaryldy.
Qazir kommýnaldyq qyzmetter qyzyl sý basýy múmkin shaǵyn aýdandarda jumysty jandandyrǵan. Jumysshy kenti, Bereke, Oıqala aýdandarynda arnaıy brıgadalar sýaǵarlardyń muzyn jaryp, ystyq býmen eritip jatyr. Turǵyndardan táýligine 30 shaqty shaqyrtý túsedi. Bul jumysqa 11 tehnıka men 40 shaqty adam jumyldyrylǵan.
SQO «Qazgıdromet» mamandarynyń aıtýynsha, jaqyn kúnderi óńirde synap baǵanasy +10 gradýsqa deıin kóterilýi múmkin. Al sáýir aıynyń alǵashqy on kúndiginde aýa raıy +20 gradýsqa deıin jylynady degen boljam bar. Bul - sý tasqynynyń bolý múmkindigin arttyra túspek.
Óńirdiń aýdandarynan qys bastalǵaly 800 myń tekshe metr qar shyǵaryldy. Qazir turǵyndarǵa qosymsha kómek kórsetý úshin oblystyq Tótenshe jaǵdaılar departamentiniń jedel-qutqarý jasaǵynyń jeke quramynan 18 qutqarýshy 3 joǵary ótimdi avtokólikpen Aıyrtaý jáne Ǵ.Músrepov aýdandarynda jumys istep jatyr.
SQO Tótenshe jaǵdaı departamenti baspasóz qyzmetiniń málimetinshe, Aıyrtaý aýdanynda qutqarýshylar sý basý qaýpi bar aýlalardy aralap, turǵyndarǵa jadynama taratty. Aqan burlyq ózeninde muzdy jaryp, Raısovka aýylyndaǵy jergilikti sý qoımalarynda muzdy kesý jumystaryn júrgizdi.
Al Ǵ. Músirepov aýdanynda mamandar 26 naýryzdan bastap 263 úıdi aralap, sý basý qaýpi bar eldi-mekenderdegi 400 metrge jýyq aryqtardy tazalady.
Qazirgi tańda oblys boıynsha 92 eldimeken, 2,3 myń úı jáne 8 myńnan astam turǵyn baqylaýǵa alynǵan. 700-den astam tehnıka, 300-den astam sý soratyn qondyrǵy tótenshe jaǵdaıǵa ázir. Mamandardyń aıtýynsha, ázirshe Sergeev sý qoımasy 93,4%, Petropavl bógeni 89,8% sýǵa tolǵan.
