SQO-da qutqarýshylar kólik apatyna túsken áıeldi qutqardy
PETROPAVL. QazAqparat – Soltústik Qazaqstan oblysy Aıyrtaý aýdanynda eki kólik betpe-bet soǵylyp, bir adam aýyr jaraqattandy, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, jol-kólik apaty 15 qańtar tús kezinde bolǵan. Aıyrtaý aýdany Saýmalkól aýylyndaǵy № 7 órt sóndirý bólimshesine Kókshetaý-Rýzaevka trassasynda Komarovka-Antonovka eldi mekenderiniń aralyǵynda jol-kólik apaty bolyp, bir adamdy kólikten alyp shyǵý qajettigi habarlandy.
Jolda «Lexus» pen «Volkswagen Passat» jeńil kólikteri betpe-bet kelip soqtyǵysqan. Esil aýdanynan Imantaýǵa bara jatqan kóliktegi 44 jastaǵy jolaýshy áıel kólikke qystyrylyp qalǵan eken.
«Zardap shekken áıel júrgizýshiniń qasynda otyrǵan. Onyń aıaǵy synyp, eseńgirep qalǵan. Jigitter maıysqan kólik esigin buzyp ashyp, áıeldiń qystyrylǵan aıaǵyn metaldan bosatyp aldy. Aqyryn alyp shyǵyp, medıtsınalyq qyzmetkerler, polıtseılerdiń kómegimen jedel járdem kóligine mingizip jiberdik. Qazir ol Aıyrtaý aýdandyq aýrýhanasynda, ómirine keler qaýip joq», - deıdi Aıyrtaý aýdandyq tótenshe jaǵdaılar bóliminiń ınjeneri Murat Jambylov.
Kólikterdiń júrgizýshilerine de medıtsınalyq kómek kórsetildi.
