Qyrylyp qala jazdaǵan: SQO-da sýy taıaz kóldiń balyqtary Esilge jiberildi
PETROPAVL. KAZINFORM – Soltústik Qazaqstan oblysynda balyq ınspektsııasy sý jándikteriniń qyrylýyna jol bermeý maqsatynda sý qoımalaryna monıtorıng júrgizip jatyr.
Esil oblysaralyq basseındik balyq sharýashylyǵy ınspektsııasynyń SQO boıynsha bóliminiń qyzmetkerleri balyq qyrylý qaýpi bar Qyzyljar aýdanyndaǵy Jelıakovo kóliniń jaǵdaıyn tekserdi. Bul – jalǵa berilmegen, rezervte turǵan sý aıdyndarynyń biri. Sý tasqyny kezinde Jelıakovo kóli Esil ózenimen qosylady.
- Aýa jetispeýshiliginen balyqtardyń qyrylýyna az-aq qalǵan. Sol sebepti balyqty aýlap, keıin ony Esil ózenine jiberýge sheshim qabyldandy.
Júrgizilgen jumystardyń nátıjesinde 400-den astam balyq - shortan, sondaı-aq torta men aqqaıran shabaqtary qutqaryldy. Endi olardyń ottegi jetispeýshiliginen nemese sý aıdynynyń tartylyp qalýynan qyrylý qaýpi joq, sýy mol ózende erkin ósip-ónedi, - deıdi balyq ınspektsııasynyń qyzmetkerleri.
Balyqtardy qutqarý jumysy áli de jalǵasady. Tıisti aqparat SQO Tabıǵı resýrstar jáne tabıǵat paıdalanýdy retteý basqarmasyna jiberildi. Mamandar óńirdegi qalǵan kólderdi de tekserip jatyr.
Buǵan deıin SQO kólderinde muz ben qardyń qalyńdaýyna baılanysty sý aıdyndarynda aeratsııa jumysy bastalǵanyn jazǵan edik.