SQO-da qutyrma taratýy múmkin túlki-qarsaqqa 25 myńǵa jýyq vaktsına berildi

PETROPAVL. KAZINFORM – Soltústik Qazaqstan oblysynda túlki, qarsaq, janat tárizdes ıt sııaqty jabaıy janýarlarǵa bıyl qutyrma aýrýynyń aldyn alý úshin vaktsına berilip jatyr. Osy maqsatqa 24 800 dana arnaıy brıket ázirlengen.

SQO veterınarııa basqarmasynyń málimetinshe, jem brıketke qosylǵan vaktsınalar jabaıy janýarlar júretin jerlerge qoıyldy. Bul sharýany atqarýǵa veterınarlarǵa qoryqshylar kómektesti.

Jalpy bıyl qutyrmamen kúresý úshin 250 240 myń janýardy egý josparlanǵan. Búginge deıin 91 myńǵa jýyq janýarǵa vaktsına qoıyldy, onyń ishinde 35 myń iri qara mal, sonsha qoı-eshki, 11 myńnan astam jylqy, 6,5 myń ıt jáne 2,5 myń shamasynda mysyq bar.

Mamandardyń aıtýynsha, oblysta qutyrma jáne janýarlardyń basqa da aýrýlary boıynsha turaqty epızootııalyq jaǵdaı saqtalǵan. Bıyl zerthanalyq zertteýlerdiń nátıjesi boıynsha qutyrmanyń úsh deregi tirkeldi. Onyń birinde aýrýdy túlki ákelse, taǵy eki jaǵdaıda eki ıtte rastaldy.

«Qyzyljar aýdanynda 2 eldi mekende jáne Ǵ. Músirepov aýdanynda bir eldi mekende qutyrmaǵa qarsy shekteý enshizilip, búginde ol alyndy. Jaǵdaı turaqty.

Qutyrma - vırýstyq aýrý, jedel ótedi, juqpaly, sońy ólimge ákeletin aýrý. Ortalyq júıke júıesin aýyr zaqymdaıdy. Qutyrma vırýsy juqtyrǵanmen baılanysta bolýdan tikeleı juǵady. Sondaı-aq qutyrma aýrý janýar qapqanda qan, silekeı arqyly taralady», - deıdi veterınarlar.

Esterińizge salaıyq, Ýálıhanov aýdany Teljan aýylynda jylqy rınopnevmonııasy jáne jylqy tumaýy anyqtalǵanyn jazǵan edik.