SQO-da qutyrma aýrýyna baılanysty Amangeldi aýylyna shekteý engizildi
PETROPAVL. KAZINFORM — Soltústik Qazaqstan oblysy Esil aýdanyndaǵy Amangeldi aýylynda qutyrma aýrýy tirkeldi.
SQO veterınarııa basqarmasynyń málimetinshe, qaýipti vırýs aýyldaǵy ıtke juqqan. Iesine shaýyp, talamaq bolǵan janýardan kúdiktengen turǵyn veterınarlarǵa júginip, kómek suraǵan. Júrgizilgen zerthanalyq saraptama nátıjesinde ıtten qutyrma derti anyqtaldy.
Osyǵan baılanysty qaýipti aımaqta ıt pen mysyq kórmelerin ótkizýge, janýarlardy satýǵa jáne olardy eldi meken aýmaǵynan shyǵarýǵa ýaqytsha tyıym salyndy. Sonymen qatar, indet oshaǵynda dezınfektsııa jumystary júrgizilip, 45 úı janýaryna qutyrýǵa qarsy ekpe salyndy.
Veterınarııa basqarmasynyń bólim basshysy Narıman Tasbolatovtyń aıtýynsha, engizilgen shekteý sharalary vaktsınatsııa júrgizilgennen keıin eki aı ótken soń alynýy múmkin.
— Qazirgi ýaqytta epızootııalyq jaǵdaı turaqty. Josparly veterınarlyq is-sharalar tolyq kólemde atqarylyp jatyr, — dedi Narıman Tasbolatov.
Mamandar turǵyndardy saqtyq sharalaryn qatań saqtaýǵa, úı janýarlaryn ýaqtyly vaktsınatsııalaýǵa jáne kúmándi jaǵdaılar týyndaǵan kezde dereý veterınarlarǵa habarlasý qajettigin eskertedi.
Sanıtarlyq-epıdemıologııalyq qyzmet ókilderi oblys aýmaǵynda adamdar arasynda qutyrma aýrýyn juqtyrý deregi tirkelmegenin atap ótti.
Buǵan deıin SQO-da antırabbııalyq kómekke janýarlar qapqan, tyrnaǵan, tistegen 385 adam júgingenin jazǵan edik. Bul ótken jylmen salystyrǵanda 67% artyq.
