SQO-da qutyrma aýrýy bar túlki aýylǵa kirip ketti

PETROPAVL. KAZINFORM –  Soltústik Qazaqstan oblysynda aýyl turǵynynyń qorasyna kirip ketken túlkiden qutyrma aýrýy anyqtaldy. 

SQO veterınarııa basqarmasynyń málimetinshe, oqıǵa 28 mamyr kúni Ǵabıt Músirepov atyndaǵy aýdannyń Starobelka eldi mekeninde bolǵan. Úıdiń aýlasyna kirgen túlkini turǵyn qoraǵa qamap, birden veterınarlyq qyzmetke habar bergen.

«Túlkiniń aýrý ekeni syrtqy belgilerinen-aq kórinip turdy, shabýyldap, aýzynan silekeı aqty. Sondyqtan óltirýge týra keldi. 3 maýsym kúni zerthana qorytyndysy kelip, jabaıy janýarda qutyrma aýrýy bolǵany rastaldy», - deıdi vedomstvonyń baspasóz hatshysy Amanjol Nurtazın.

Aýyl turǵynynyń aıtýynsha, aýrý túlkimen tikeleı baılanys bolmaǵan. Soǵan qaramastan veterınarlyq talaptarǵa sáıkes onyń aýlasyna shekteý sharasy qoldanylmaq.

«Birlik aýyldyq okrýginiń ákimi turǵyn úı aýmaǵynda shekteý sharalaryn belgileý týraly sheshim qabyldaıdy. Osydan keıin respýblıkalyq epızootııalyq otrıad vırýstyń taralýyna jol bermeý maqsatynda túlki turǵan qorany jáne aýlany dezınfektsııalaıdy. Budan bólek turǵynnyń barlyq úı janýaryna – 8 qoı, eki mysyq pen ıtine qutyrma aýrýyna qarsy ekpe egiledi», - deıdi Amanjol Nurtazın.

SQO-da sońǵy ret qutyrma aýrýy 2021 jyly tirkelgen eken.

Buǵan deıin SQO-da byltyr 42 syrqatqa joǵary tehnologııalyq otanyń tegin jasalǵanyn aıtqan edik.