SQO-da kúshti jel aýyl mektebiniń shatyryn ushyryp áketti
PETROPAVL. QazAqparat – Soltústik Qazaqstan oblysynda bolǵan daýyl men jańbyr Taıynsha aýdanyndaǵy aýyl mektebiniń shatyryn ushyryp áketti, dep habarlaıdy QazAqparat tilshisi.
Áleýmettik jelide tabıǵattyń dúleı minezi – daýyldy jańbyrdyń beınejazbasy tarady. Oqıǵa 11 shilde kúni saǵat 15.00 shamasynda SQO Taıynsha aýdanynyń Chermoshnıanka eldi mekeninde bolǵan. Qatty daýyl aýyl mektebiniń shatyryn ushyryp áketken.
SQO bilim basqarmasynyń málimetinshe, daýyl saldarynan Chermoshnıanka orta mektebiniń aýmaǵy 924 sharshy metr bolatyn shatyry zaqymdandy. Zardap shekkender joq. Óıtkeni bul ýaqytta mektepte eshkim bolmaǵan.
Bilim ordasy 2008 jyly kúrdeli jóndelip, shatyry, jylytý júıesi aýystyrylǵan eken.
«Qazgıdromet» RMK SQO fılıalynyń málimetinshe, 10 shilde kúni saǵat 21.00-den 11 shilde kúngi saǵat 21.00-ge deıin kún raıyna baılanysty eskertý jarııalanǵan.
«11 shilde kúni SQO-nyń basym bóliginde jańbyr jaýyp, batys, soltústik jáne shyǵysynda naızaǵaı oınap, daýyl turady. Túnde jáne tańerteń soltústik-batysta tuman túsedi. Soltústik-shyǵystan ekpini sekýndyna 15-20 jáne 23 metrge deıin jetetin daýyl turady», - delingen habarlamada.
Mamandardyń aıtýynsha, 11 shildede kúndiz Taıynsha aýdanynda tómen qysymdy jáne frontaldy aýa raıy ornaǵan. Meteorologııalyq jaǵdaıdan naızaǵaı oınap, daýyl turǵan.
«Daýyl - qysqa ýaqyt aralyǵynda kenetten kúsheıip, uzaqtyǵy 2 mınýttan aspaıdy, keıde jeldiń baǵyty ózgeredi. Jeldiń jyldamdyǵy 10 m/s-tan, kóbinese 25 m/s-tan asady. Daýyldyń uzaqtyǵy ádette 1 mınýt bolady jáne naızaǵaı men nóser kezinde baıqalady.
Taıynsha aýdany Chermoshnıanka aýylynyń aýmaǵynda baqylaý pýnkti joq. Eń jaqyn baqylaý pýnkti Taıynsha aýdany Taıynsha qalasynda ornalasqan», - deıdi sınoptıkter.
Al «Taıynsha» meteorologııalyq stansanyń derekteri boıynsha, daýyl 13 saǵat 55 mınýttan 15 saǵat 00 mınýt aralyǵynda bolyp, jeldiń ekpini sekýndyna 14 metrge deıin jetken.
