SQO-da qus fabrıkasynda shyqqan órtti sóndirýge shamamen 60 adam tartyldy
PETROPAVL. QazAqparat – Soltústik Qazaqstan oblysy Prıbrejnoe eldi mekeninde jumyrtqa lotogyn jasaıtyn tseh órtendi, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, Qyzyljar aýdanyndaǵy Prıbrejnoe eldi mekenindegi tseh ǵımaratynda órt shyqqandyǵy jóninde habar «101» nómirine 2 mamyr kúni saǵat 18.32-de túsken.
Órt sóndirý bólimsheleri jetken kezde tsehtyń konveıer-qoıma bóliginde kartonnan jasalǵan jaımalar men shatyry jáne 100 sharshy metr aýmaqtaǵy brıkettelgen qaǵaz qaldyqtary janyp jatqan. Mamandardyń aıtýynsha, qatty jel jáne nysanda sýdyń bolmaýy, sondaı-aq karton jaımalardyń kóptigi órt sóndirýshilerdiń jumysyn qıyndata túsken. Jalynmen kúreske Petropavl qalasynyń 4 bólimshesi jáne Beskól aýylynyń órt sóndirý bólimshesi tartyldy. Oqıǵa ornynda 58 adam jáne 9 arnaıy tehnıka jumys istedi.
Órtti tek 20 saǵat 44 mınýtta ǵana tolyq aýyzdyqtaý múmkin boldy. Saldarynan 200 sharshy metr aýmaqtyń shatyry jáne daıyn turǵan ónim – 10 myń dana jumyrtqa jaımasy janyp ketti. Sondaı-aq 900 sharshy metr aýmaqtyń shatyryna zaqym keldi.
Zardap shekkender men qaza tapqandar joq, órttiń shyǵý sebebi jáne kelgen shyǵyn mólsheri anyqtalyp jatyr.
