SQO-da qus fabrıkasynda jaraqat alǵan er adamnyń qolyna ampýtatsııa jasaldy

PETROPAVL. KAZINFORM — Soltústik Qazaqstan oblysynda qus fabrıkasynyń jumysshysy óndiristik jaraqat aldy.

Jumys barysynda abaısyzda onyń qoly júrip turǵan jabdyqqa qysylyp qalǵan.

SQO densaýlyq saqtaý basqarmasy baspasóz qyzmetiniń málimetinshe, jaraqat alǵan er adam 22 aqpan kúni keshke aýyr halde aýrýhanaǵa jetkizildi.

Onyń oń jaq ıyq súıeginiń ortańǵy bóligi ashyq túrde synyp, súıek yǵysqan. Qoly qatty jyrtylyp, myjylǵan. 

Naýqasqa shuǵyl túrde ota jasaldy. Aýyr jaraqat saldarynan dárigerler onyń qolyn bilekten joǵary, ıyq súıeginiń úshten bir bóligi deńgeıinde kesip alyp tastaýǵa májbúr boldy.

Qazirgi ýaqytta er adam jansaqtaý bóliminde jatyr, jaǵdaıy aýyr.

Buǵan deıin óndiristik jaraqat alǵan adamǵa ótemaqy qalaı esepteletinin jazǵan edik.