SQO-da qus fabrıkasy ólekselerdi jaıylymǵa shyǵaryp tastaǵan
PETROPAVL. KAZINFORM – Soltústik Qazaqstan oblysy Aqqaıyń aýdany Aralaǵash aýylynyń turǵyndary jaz shyǵa mal aýrýy beleń ala ma dep qaýiptenip otyr. Jergilikti qus fabrıkasy ólgen qusty aýyldyń maly jaıylatyn jerge shyǵaryp tastaǵan.
Veterınarııalyq baqylaý jáne qadaǵalaý komıtetiniń SQO aýmaqtyq ınspektsııasynyń málimetinshe, veterınarııalyq qyzmet aýyldyq okrýg ákimdigimen birge búgin Aralaǵash aýylyna bardy.
Jaıylymda qus ólekseleriniń shashylyp jatqany rastaldy.
Aýyl turǵyndary ólgen qusty Aralaǵash aýylynyń janyna 2-2,5 shaqyrym jerge osy eldi mekendegi qus fabrıkasynyń shyǵarǵanyn aıtyp otyr.
Veterınarlyq zańnamada mundaı áreketke qatań tyıym salynǵan. Óıtkeni qardyń erip, kúnniń jylynýymen úı janýarlary men qustardyń juqpaly aýrýlarynyń taralý qaýpi bar.
Mamandardyń aıtýynsha, mal-qus ólekseleleri osy maqsatqa arnaıy bólingen oryndarda joıylýy kerek.
Qus fabrıkasynyń basshylyǵy jer asty sýy joq aýmaqta tıisti talapty saqtaı otyra ólekselerdi kómetin boldy nemese jaǵý arqyly joıýǵa mindetteme aldy.
Qazirgi ýaqytta qus fabrıkasy men Petropavldaǵy bıoqaldyqtardy joıatyn seriktestik arasynda tasymaldaý jáne ólekseni joıý qyzmetin kórsetýge qatysty kelisimshart jasaldy.
Sondaı-aq qus fabrıkasynyń basshylyǵy Ákimshilik quqyq buzý týraly kodekstiń 406-babyna sáıkes aıyppul túrindegi ákimshilik jaýapkershilikke tartylmaq.
