SQO-da qurylysy uzaqqa sozylǵan shekara beketteri qashan qoldanysqa beriledi
PETROPAVL. KAZINFORM – Soltústik Qazaqstan oblysynda úsh jyl buryn salyna bastaǵan memlekettik shekara bólimsheleriniń qurylysy bıyl aıaqtalýy múmkin.
2022 jyly «Qaýipsiz el» ulttyq jobasy aıasynda SQO-da 12 shekara beketinde qurylys jumysy bastaldy. Memlekettik baǵdarlama aıasynda áskerı qyzmetshilerge jaǵdaı jasalyp, bólimderdiń materıaldyq-tehnıkalyq bazasy nyǵaıtylýy tıis edi. Biraq jumys sozylyp ketti. Baǵdarlamanyń ákimshisi jáne tapsyrys berýshi – QR Kólik mınıstrligi. Vedomstvo bergen jaýap boıynsha shekara beketterindegi qurylys bıyl aıaqtalady.
- Búgingi kúni «Qaýipsiz el» ulttyq jobasy aıasynda SQO-da QR Ulttyq qaýipsizdik komıteti Shekara qyzmetiniń memlekettik 12 shekaralyq bóliminiń qurylys jumystary jalǵasyp jatyr.
Qazynada qarajattyń jetkiliksizdiginen jobany júzege asyrýda týyndaǵan kidiristerge baılanysty 2024 jyly jobalardy aıaqtaý múmkin bolmady. Aıaqtaý merzimi 2025 jylǵa aýystyryldy, - deıdi mınıstrliktiń baspasóz qyzmeti.
QR Ulttyq qaýipsizdik komıtetiniń málimetinshe, byltyr SQO-nyń shekara qyzmeti jalpy somasy 69 mln teńgeden asatyn janar-jaǵarmaı materıaldaryn ótkizýdiń 460 faktisin, salmaǵy 3,4 myń tonnadan asatyn qara jáne tústi temir qaldyǵyn ótkizýdiń - 30, sondaı-aq somasy 970 mln teńgeden asatyn shetel valıýtasyn zańsyz ótkizýdiń 82 deregin anyqtap, jolyn kesti.
Bıyl memlekettik shekarany qasaqana zańsyz buzý deregi boıynsha sotqa deıingi 3 tergep-tekserý tirkelgen.
Buǵan deıin Naýryz merekesinde Qytaımen shekaradaǵy avtomobıl ótkizý pýnktteri 2025 jyldyń 21-23 naýryz aralyǵynda jumys istemeıtindigin jazǵan edik.