SQO-da qurylys kompanııalary aıaqtalmaǵan nysandardy paıdalanýǵa bergen
PETROPAVL. KAZINFORM – Soltústik Qazaqstan oblysynyń prokýratýra organdary qurylys, sáýlet jáne qala qurylysy salasyndaǵy zańnamanyń saqtalýyn qamtamasyz etýge baǵyttalǵan jumystarǵa júrgizilgen taldaý nátıjesinde «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» QR Zańy talaptaryn óreskel buzý jaǵdaılaryn anyqtaldy.
Bul týraly oblystyq prokýratýranyń baspasóz qyzmeti habarlady.
Atap aıtqanda, qurylys jumystary belgilengen tártipti saqtamaı júrgizilgen. Máselen, Petropavl qalasynda bir qurylys salýshy ýákiletti memlekettik organǵa qurylys-montaj jumystarynyń bastalǵany týraly habarlama bermeı, kóppáterli turǵyn úılerdiń qurylysyn júzege asyrǵan.
Basqa jaǵdaıda, bes qurylys salýshy zańnama talaptaryn buza otyryp, oblys ortalyǵy aýmaǵynda nysandardy is júzinde tolyq aıaqtalmaǵanyna qaramastan paıdalanýǵa qabyldaǵan.
Sonymen qatar, eki kásipkerlik sýbektisi «Turǵyn úı qurylysyna úlestik qatysý týraly» Qazaqstan Respýblıkasy Zańynyń talaptaryna qaıshy, tıisti ruqsat qujattaryn almaı, Petropavl qalasynda turǵyn úı keshenderiniń qurylysyna úleskerlerdiń qarajatyn tartqan.
Prokýrorlyq qadaǵalaý aktisi boıynsha atalǵan sýbektiler jiberilgen zańbuzýshylyqtar úshin aıyppul túrindegi ákimshilik jaýapqa tartyldy, anyqtalǵan zańbuzýshylyqtardy joıý boıynsha sharalar qabyldanyp jatyr.
Qadaǵalaý organy osy salada zańdylyqty qamtamasyz etýge jáne quqyq buzýshylyqtardyń aldyn alýǵa baǵyttalǵan jumysty jalǵastyrýda.
- Sonymen qatar, prokýratýra qurylys salasyndaǵy zańnama talaptaryn saqtaý qurylys qyzmetine qatysýshylardyń barlyǵy úshin mindetti ekenin eske salady. Azamattarǵa úlestik qurylysqa qarajat salmas buryn qurylys salýshynyń jer ýchaskesine quqyq belgileıtin qujattarynyń, sondaı-aq qurylys júrgizýge arnalǵan ruqsat qujattarynyń bar-joǵyn tekserý usynylady,-delingen Soltústik Qazaqstan oblysynyń prokýratýrasy taratqan habarlamada.
Osyǵan deıin memlekettik qala qurylysy kadastrynyń avtomattandyrylǵan aqparattyq júıesi engiziletini týraly jazdyq.