SQO-da quramynda esirtkisi bar preparattardy saqtaýda zańbuzýshylyqtar anyqtaldy

PETROPAVL. KAZINFORM – Soltústik Qazaqstan oblysy aýmaǵynda 22-26 qyrkúıek aralyǵynda ótken «Dármek» jedel-aldyn alý is-sharasynyń qorytyndysy shyǵaryldy. 

SQO Polıtsııa departamenti esirtki qylmysyna qarsy is-qımyl basqarmasynyń bastyǵy Rýslan Úmbetovtyń aıtýynsha, bul is-sharanyń maqsaty esirtki quraldarynyń, psıhotropty zattardyń, prekýrsorlardyń, ýly jáne kúshti áser etetin dári-dármekterdiń zańdy aınalymyn baqylaý boldy. Nátıjesinde, qaýipti zattardy saqtaýda zańsyzdyqqa jol berilgeni anyqtaldy. 

– Medıtsına salasynda ákimshilik zańnamany buzýdyń 18 deregi anyqtaldy. 13 medıtsına qyzmetkerine qatysty materıaldar jınaldy. Esirtki zattary bar shamamen 1 myń tabletka, 8 myńnan astam psıhotroptyq tabletka jáne 1 myń 300-den asa ampýla tárkilendi. Barlyǵy 38 medıtsınalyq mekeme tekserildi, - deıdi Rýslan Úmbetov. 

Polıtseıdiń aıtýynsha, ónerkásip salasynda 5 quqyqbuzýshylyq áshkerelendi. 286 kılogramm prekýrsordyń aınalymy shektelip, 5 zańdy tulǵa jaýapkershilikke tartyldy. Barlyǵy 30 kásiporyn men 89 kólik quraly tekserilgen. 

Buǵan deıin Petropavlda jerasty jylý kollektorynda órt shyǵyp, bir áıel mert bolǵanyn jazǵan edik.