SQO-da qýraǵan shópti órteý saldarynan úsh úı janyp, eki adam zardap shekti
PETROPAVL. QazAqparat – Soltústik Qazaqstan oblysyndaǵy Zolotaıa Nıva eldi mekeninde byltyrdan qalǵan sabandy jaǵýdyń saldarynan eki turǵyn jaraqat aldy, dep habarlaıdy QazAqparat tilshisi.
SQO Tótenshe jaǵdaılar departamentiniń málimetinshe, oqıǵa 19 sáýir kúni bolǵan. Maǵjan Jumabaev aýdany Býlaev qalasyndaǵy órt sóndirý qyzmetine saǵat 14.54 mınýt ketkende Zolotaıa Nıva eldi mekeniniń mańynda qurǵaq shóptiń janyp jatqandyǵy jaıynda habar túsedi. Mamandar jetkenshe deıin erikti órt sóndirý qurylymdary jalynmen kúresti bastap ketken eken.
«Órtti aýyzdyqtaý úshin K-700 traktoryn tartqan. Jalpy 1200 sharshy metr aýmaqty jalyn sharpydy. Tek saǵat 17.30 ǵana tolyq sóndirildi. Órt sóndirý barysynda eki adam zardap shekti. Onyń bireýi 1977 jylǵy er adam. Jalynmen arpalysta omyrtqasyna zaqym keldi. Qazirgi tańda M.Jumabaev aýdanyndaǵy ortalyq aýrýhanada em alyp jatyr. Ekinshisi 1974 jylǵy turǵyn. Bel omyrtqasyn soǵyp alǵan. Oǵan alǵashqy medıtsınalyq kómek kórsetilip, úıine qaıtaryldy. Iesiz turǵan úsh úı janyp ketti», - deıdi SQO TJD bastyǵynyń orynbasary Nurlan Atyǵaev.
Taǵy bir órt búgin saǵat tańǵy 6.30-da M. Jumabaev aýdanyndaǵy Izobılnoe eldi mekeninde tirkeldi. Belgisiz bireýler qurǵaq shópti jaǵyp, ol qatty jeldiń saldarymen aýylǵa kirip ketken. Saldarynan ıesiz turǵan úsh úı janyp ketti. Jalpy bul eldi mekende 7-8 úı ǵana qalsa, sonyń bireýinde ǵana turǵyndar bar. Órt tolyǵymen sóndirilgen joq. Oqıǵa ornynda mamandar jumys istep jatyr.
«Zolotaıa Nıva eldi mekeninde alqapta byltyrdan qalǵan sabandy jaqqannan órt shyqqan. Oǵan qatty jeldiń saldarynan ıe bola almaı qalyp, jalyn aýyldyń shetine kirip ketken. Qazir is óndiriste. Órt qoıǵandar ákimshilik jaýapqa tartylady, aıyppul qarastyrylǵan. Sońǵy kezde dala órtteri jıilep ketti. Sharýashylyqtar sabandy iske jaratýdyń ornyna nemese shyǵaryp tógýdiń ornyna jeńil joldy izdep, órtteıdi», - deıdi Nurlan Atyǵaev.
SQO-da jyl basynan 4 orman órti tirkelgen, 57 ga zaqym keldi. Bul ótken jyldyń osy aralyǵymen salystyrǵanda 4 ese artyq. Budan basqa jyl basynan oblysta qurǵaq shópti jaǵýdan 320 ret órt shyǵyp, 7 saıajaı úıi janyp ketti.
