SQO-da kúnde 3-5 adam koronavırýstan kóz jumady - basqarma
SQO densaýlyq saqtaý basqarmasynyń málimetinshe, óńirde koronavırýspen aýyrǵandarǵa arnalǵan 1755 oryn bar. Qazir 686 syrqat ınfektsııalyq statsıonarlarda em alyp jatyr. ıAǵnı statsıonarlar 36 paıyzǵa júktelgen. Emdeý mekemelerine negizinen ókpesi zaqymdanyp, ózdiginen dem ala almaıtyn naýqastar ǵana jatqyzylyp jatyr.
«Byltyr shilde aıynda koronavırýs órshigende mundaı qıyn jaǵdaı bolǵan joq. Óıtkeni qazirgi ýaqytta táýligine 60-90 adamǵa deıin aýrýhanaǵa jatqyzylady. Olardyń barlyǵy aýyr demalady, ókpelerine zaqym kelgen. Statsıonarlarda jatqan adamdardyń 60 paıyzyna únemi medıtsınalyq ottegi qajet. 51 adam jansaqtaý bólimshelerinde jatsa, solardyń 17-siniń jaǵdaıy óte aýyr. Medıtsınalyq qyzmetkerler qaýyrt jumys istep jatyr», - deıdi basqarma basshysynyń mindetin atqarýshy Nurlan Aımanov.
Qazir em alyp jatqan syrqattardyń 98 %-y vaktsına almaǵandar. Al 80 paıyzdan astamy – egde jastaǵylar. Osy kúnge deıin qaıtys bolǵandardyń 78 %-y – taǵy da jasy 60-tan asqandar.
«Búginge deıin 325 adam kóz jumdy. Kúnde koronavırýstan 3-5 adamnan kóz jumýda. Jaǵdaı óte aýyr. Táýligine 1100 ottegi ballonyn jumsaımyz. Bul 9 myń tonna ottegi», - deıdi Nurlan Aımanov.
Sondaı-aq oblys boıynsha, 3339 adam ambýlatorlyq jaǵdaıda em alyp jatyr. Olardyń 1600-inde aýrý belgileri bolmaǵan. Mamannyń aıtýynsha, qalǵandarynda dert jeńil jáne ortasha ótip jatyr.
Buǵan deıin SQO-nyń koronavırýstyń taralýy boıynsha elimizde aldyńǵy orynda turǵanyn aıtqan edik. Tek ótken táýlikte óńirde koronavırýsty 161 adam juqtyrdy. Olardyń 95 %-y dárigerlerge aýyryp kóringen.
Birer kúnde oblysta Pfizer kompanııasynyń vaktsınasyn egý bastalady. Osy maqsatta emhanalardy arnaıy ekpe pýnktteri qurylyp jatyr. Mektep oqýshylary vaktsınany oqý ornynda alatyn bolady.