SQO-da kún kúrt jylynyp, kóshelerden qar eki aýysymmen shyǵarylyp jatyr
PETROPAVL. KAZINFORM – Qys bastalǵaly Petropavl kóshelerinen 800 myń tekshe metr qar shyǵaryldy. Bul jyldaǵy ortasha kórsetkishpen birdeı.
Soltústik Qazaqstan oblysynda ekinshi kún jańbyr jaýyp, aýa temperatýrasy 0 gradýstan joǵarylady. Qar erip jatyr. Úılerge qyzyl sý kirmeýi úshin qazirgi ýaqytta eldi mekenderden qar shyǵarý jumysy qyzǵan.
Petropavl qalalyq ákimdiginiń málimetinshe, oblys ortalyǵynda bul jumysqa 170-ten astam arnaıy tehnıka jumyldyryldy. Atqarylyp jatqan sharýa qatań baqylaýǵa alynǵan.
- Bıyl qar byltyrǵyǵa qaraǵanda az, degenmen másele bar. Jeke sektorda, kóshelerde qar kóp. Sondyqtan qazir qar shyǵarý jumysy qyzý júrip jatyr. Ótken ǵasyrda salynǵan úılerdiń keıbiriniń irgetasy jerge kirip ketken. Mundaı úılerge qandaı jaǵdaıda bolmasyn sý kiredi. Sondyqtan qazir qar shyǵarylyp jatyr.
Qar qarqyndy erip jatyr. Qolda bar tehnıkanyń barlyǵy – ekskavatorlar, greıderler, júk kólikteri qazir qar shyǵarýǵa jumyldyryldy, - deıdi oblys ákiminiń birinshi orynbasary Marat Tasmaǵanbetov.
Petropavlda káriz jelileriniń jalpy uzyndyǵy 235 km, onyń 116 km — ashyq. Qazirgi ýaqytta osy sýaǵarlar da tazartylyp jatyr. Sońǵy jyldary oblys ortalyǵynda 40 shaqyrym jańa káriz jelisi salyndy. Byltyr «Birlik» jáne «Oıqala» shaǵyn aýdandarynda sý aǵyzatyn jyralar qazyldy. Sonymen qatar, qala kóshelerinde 22 shaqyrymǵa jýyq káriz júıesin jóndeý jáne jańartý jumystary júrgizildi.
Buǵan deıin SQO-da sý tasqyny qaýpin baqylaý úshin drondar qoldanylatynyn jazǵan edik.
