SQO-da qumar oıynǵa táýeldi úsh polıtseı jumystan shyǵaryldy
PETROPAVL. KAZINFORM — Tergeýshi, krımınalıst jáne túrme baqylaýshysy onlaın-platformalarda bás tigip kelgen.
Soltústik Qazaqstan oblystyq sotynyń málimetinshe, bıyl naýryz aıynda aıaqtalǵan qyzmettik tergeý nátıjesinde olardyń býkmekerlik platformalarda stavka jasaǵany anyqtaldy. Polıtsııa serjanty, ýaqytsha ustaý ızolıatorynyń qyzmetkeri R. Sálimov «1xBet» platformasyna 2023 jyldan bastap jalpy somasy 9 mln teńge mólsherinde aqsha salyp, 4 mln teńge sheship alǵan. Sondaı-aq onyń «Olimpbet» platformasyna 2020 jyly tirkelip, bás tigip kelgeni anyqtaldy. 2024 jyldan bastap «PariMatch» platformasynda da oınaǵan.
Krımınalıst A. Súleımenov te 2020 jyly «Olimpbet» saıtynda tirkelip, bes jyl ishinde 2 mln teńgege jýyq bás tikken, 1,3 mln teńge sheship alǵan.
Al tergeýshi Q. Nurjanov 2024 jyldyń sońynan «PariMatch» platformasynda 900 myń teńgeden astam stavka qoıyp, sonyń jartysyna jýyǵyn utqan.
Býkmekerlik kompanııalardan alynǵan materıaldarda polıtseılerdiń óz aty-jónderimen, jeke kýálikterimen tirkelip, verıfıkatsııadan ózderi ótkeni dáleldengen. Tergeý qorytyndysy boıynsha úsheýin de qyzmetten bosatý usynylyp, 2025 jylǵy 3 sáýirde Soltústik Qazaqstan oblysy Polıtsııa departamenti bastyǵynyń buıryǵymen olar jumystan bosatyldy.
Alaıda eks-polıtseıler maýsymda jumystan bosatýdyń zańsyz ekenin tanyp, qyzmetke qaıta alý, jumyssyz júrgen ýaqyttaǵy jalaqyny jáne turǵyn úı tólemderin óndirý týraly talap aryzben sotqa júgindi.
Petropavl qalasy № 2 sotynyń sheshimimen A. Súleımenov pen R. Sálimovtiń talaby qanaǵattandyrylmady. Al Q. Nurjanovty jumystan bosatý zańsyz dep tanylyp, onyń kúshin joıý týraly sheshim qabyldandy. Sondaı-aq onyń paıdasyna 950 myń teńge jalaqy men 300 myń teńge shamasynda turǵyn úı tólemin óndirý mindetteldi.
Alaıda qyrkúıek aıynda ýaqytsha ustaý ızolıatorynyń qyzmetkeri Sálimov pen krımınalıst Súleımenov oblystyq sotqa apellıatsııalyq shaǵym túsirdi. Olar birinshi satydaǵy sottyń sheshimin qaıta qaraýdy suraǵanymen, olardyń ótinishteri qanaǵattandyrylmady.
Apellıatsııa barysynda olardyń burynǵy áriptesi — tergeýshi Nurjanovtyń esimi ataldy. Oblystyq sottyń sot alqasy oǵan qatysty alǵashqy sheshimniń kúshin joıdy, ıaǵnı Nurjanovtyń qyzmetke qaıta oralýy jáne oǵan tólengen ótemaqylardyń barlyǵynyń kúshi joıyldy.
Buǵan deıin qumar oıyn oınaǵan 25 memlekettik qyzmetshi jumystan shyǵarylǵanyn jazǵan edik.