SQO-da qumar oıynǵa áýes toǵyz memqyzmetshi jumystan shyǵaryldy
PETROPAVL. KAZINFORM — Soltústik Qazaqstan oblysynda memlekettik qyzmetshiler arasynda qumar oıyndarǵa táýeldilik jaǵdaılary azaımaı tur.
Memlekettik qyzmet isteri agenttiginiń SQO boıynsha departamentiniń málimetinshe, byltyr Taıynsha, Aqjar jáne Esil aýdandary jergilikti atqarýshy organdarynyń alty qyzmetkeri qumar oıyndarǵa áýestigi úshin jumystan shyǵarylǵan. Bıyl osy sebeppen óńirde taǵy úsh adam qyzmetinen ketti.
— Memlekettik qyzmet — joǵary jaýapkershilik pen minsiz tártipti talap etetin sala. Alaıda sońǵy ýaqytta qyzmettik ádepke kóleńke túsiretin jaǵdaılar azaımaı tur. Ásirese, memlekettik qyzmetshiler arasynda qumar oıyndarǵa táýeldilik alańdaýshylyq týǵyzatyn máselege aınaldy.
Zańnamaǵa sáıkes mundaı áreket memlekettik qyzmetshiniń abyroıyna nuqsan keltirip qana qoımaı, qyzmetten bosatýǵa deıin aparatyn óreskel tártiptik buzýshylyq bolyp sanalady, — deıdi departamenttiń bas mamany Dıana Salǵarına.
Osyǵan oraı, memlekettik qyzmetshiler arasynda sybaılas jemqorlyqtyń aldyn alý jáne ádep talaptaryn saqtaý máseleleri taǵy da kún tártibine shyqty. Bul joly mamandar oblystyq Tekserý komıssııasynyń qyzmetkerlerimen kezdesip, semınar ótkizdi.
— Qatysýshylarǵa lýdomanııanyń adam ómirine, otbasy men qoǵamǵa zardaby týraly arnaıy beınerolık te kórsetildi. Qumar oıyn qarjylyq qıyndyqtarǵa ǵana emes, bedelden aıyrylýǵa, psıhologııalyq táýeldilikke jáne áleýmettik máselelerge ákeletini belgili, — deıdi Dıana Salǵarına.
Buǵan deıin Shymkent turǵynynyń zańsyz oıyn bıznesinen 2,8 mlrd teńge tárkilengenin jazǵan edik.
