SQO-da qumar oıyn oınaǵan eki memlekettik qyzmetshi jumystan shyǵaryldy

PETROPAVL. KAZINFORM – Soltústik Qazaqstan oblysy Aqjar aýdanynda eki memlekettik qyzmetshi Zań talaptaryn buzyp, býkmekerlik keńsede bás tigip kelgen. 

Bul týraly oblystyq ádep jónindegi keńeste belgili boldy. Aqjar aýdanynyń ákimi Rústem Elýbaevtyń aıtýynsha, qumar oıynyn oınaǵan Aqjar aýdandyq qurylys, sáýlet jáne qala qurylysy bóliminiń bas mamany jáne osy aýdannyń Uıaly aýyldyq okrýgi ákimi apparatynyń bas mamany-esepshisi qyzmetinen bosatyldy. Muny jumys barysynda prokýratýra anyqtaǵan.

Budan bólek, 2024 jyl men 2025 jyldyń jarty jylynda 35 memlekettik qyzmetshi ákimshilik jaýapkershilikke tartylǵan. Onyń ishinde qoǵamdyq orynda qoqys tastaǵany úshin eki qyzmetker jazalanǵan. 

– Bıyl 20 memlekettik qyzmetshi tártiptik jaýapkershilikke tartyldy. Onyń ishinde 4 eskertý, 10 sógis, 2 qatań sógis jáne bir qyzmetker tolyq sáıkes bolmaý týraly eskertý aldy, - deıdi Rústem Elýbaev. 

Aýdanda qazir kadr jetispeýshiligi ózekti. Ákimdik jyl basynan jumysqa qabyldaý boıynsha 24 konkýrs uıymdastyrǵan. 11 memlekettik qyzmetker jumys ornyn bosatqan.

– Onyń ishinde mekejaıyn aýystyrýǵa, zeınetke shyǵýǵa, basqa qyzmetke aýysýǵa baılanysty jumystan ketkender bar. Sonymen qatar rotatsııalaýdan bas tartqan aýdan ákiminiń áleýmettik máseleler boıynsha orynbasary da ornyn bosatty. Memlekettik qyzmetke eshkimniń barǵysy kelmeıdi. Aýyldyq okrýg ákimi bolý úshin saılaýǵa túsetin adam joq. TÚKSh, qurylys bólimderinde maman joq, - deıdi aýdan ákimi. 

Oblystyq ádep jónindegi keńestiń tóraǵasy Erjan Karymsaqov aýdan ákimi Rústem Elýbaevtyń jumysyn synǵa aldy. Máselen qazir joǵary oqý ornynyń úzdik túlekteri eshqandaı konkýrssyz memlekettik qyzmetke ornalasa alady. Alaıda keıingi úsh jyl ishinde aýdan ákimdigi bir de bir túlekti jumysqa qabyldamaǵan. 

Buǵan deıin Petropavl JEO-2 jańa tútin murjasy qoldanysqa daıyn turǵanyn jazǵan edik.