SQO-da Kúlásh Baıseıitova atyndaǵy Qazaq ulttyq óner ýnıversıtetiniń ókildigi ashylady
ASTANA. KAZINFORM - Qazaqstan Respýblıkasy Mádenıet jáne aqparat mınıstrliginiń qoldaýymen Kúlásh Baıseıitova atyndaǵy Qazaq ulttyq óner ýnıversıteti elimizdegi daryndy jastardyń bilim alyp, shyǵarmashylyq turǵydan damýyna jaǵdaı jasap keledi.
-Mádenıet pen óner salasynda sapaly bilim alýǵa jaǵdaı jasaýǵa baǵyttalǵan memlekettik saıasat aıasynda jańa oqý jylynan bastap ýnıversıtettiń Soltústik Qazaqstan oblysynda ókildigi ashylady. Bul bastama óńirdegi daryndy jastardy qoldaýǵa, olardyń kásibı bilim alýyna jáne shyǵarmashylyq áleýetin damytýǵa baǵyttalady,-delingen mınıstrlik taratqan habarlamada.
Búginde Kúlásh Baıseıitova atyndaǵy Qazaq ulttyq óner ýnıversıteti – mýzyka, teatr, beıneleý óneri, kıno jáne teledıdar, art-menedjment jáne ózge de shyǵarmashylyq baǵyttar boıynsha joǵary bilikti mamandar daıarlaıtyn elimizdegi jetekshi óner oqý oryndarynyń biri. Ýnıversıtet stýdentteri men túlekteri halyqaralyq baıqaýlar men festıvalderde el namysyn abyroımen qorǵap, salada tabysty eńbek etip, ulttyq mádenıettiń damýyna eleýli úles qosyp keledi.
Soltústik Qazaqstan oblysynda ýnıversıtet ókildiginiń ashylýy óńir jastarynyń shyǵarmashylyq áleýetin damytýǵa serpin berip, daryndy jastardyń kásibı bilim alýyna jol ashady.
Talapkerlerdi qabyldaý «Óner jáne gýmanıtarlyq ǵylymdar» baǵyty boıynsha mynadaı bilim berý baǵdarlamalarynyń toptary negizinde júrgiziledi:
Teatr óneri
Beıneleý óneri
Vokal óneri
Dástúrli mýzyka óneri
Estrada óneri
Kıno jáne teledıdar rejıssýrasy
2026-2027 oqý jylyna qujat qabyldaý jáne oqýǵa túsý máseleleri boıynsha keńes berý jumystary 2026 jylǵy 20 maýsym men 6 shilde aralyǵynda Astana qalasy, Táýelsizdik dańǵyly, 50 mekenjaıynda júrgiziledi.
Qabyldaý emtıhandary 2026 jylǵy 7 shildede bastalady.
Osyǵan deıin habarlaǵanymyzdaı,Mádenıet salasyndaǵy memlekettik stıpendııaǵa ótinim qabyldaý bastaldy.
