SQO-da qubyrmen keletin sýdyń sapasy tómen
PETROPAVL. QazAqparat – Soltústik Qazaqstan oblysynda kásipkerler QR Parlamenti Senaty jáne Májilis depýtattarymen kezdesip, kókeılerinde júrgen máselelerimen bólisti, dep habarlaıdy QazAqparat tilshisi.
SQO Kásipkerler palatasy baspasóz qyzmetiniń habarlaýynsha, depýtattarmen kezdesýge shaǵyn, orta jáne iri bıznes ókilderi, túrli salada júrgen kásipkerler keldi. Óıtkeni bul - memlekettik deńgeıde sheshilýi tıis jergilikti máselelerdi Úkimetke jetkizýdiń birden-bir joly.
Kásipkerler kezdesýde elektr qýatyna saralanǵan tarıftiń alynyp tastalǵanyna narazylyq bildirdi. Saldarynan keıbiriniń shyǵyny mln teńgeden asyp ketken. SQO men RF Qorǵan oblysy, Esilkóldegi shekaradan ótý máselesi de áli kúnge sheshilmegen. Búginde munda bar qujat qolmen toltyrylady jáne bir elden ekinshisine ótý úshin 4-5 saǵat kútý qajet.
Talqyǵa túsken taǵy bir másele – sý qubyrymen keletin aýyz sýdyń sapasy. «Zenchenko ı K» komandıttik seriktestiginiń sút zaýytyna sheteldik qondyrǵyny jýý úshin qosymsha sý tazartqysh júıeni iske qosýǵa týra kelgen. Qubyrmen kelip turǵan sýdyń sapasyzdyǵy sondaı, nemis qondyrǵysy isten shyǵa jazdaǵan. Qazir bul sýdy oblystyń barlyq turǵyndary tutynady. Petropavlda balama sý kózderi joq. Kásipkerler depýtattardan onyń sapasyn jaqsartýǵa, jalpy óńirdegi taza sý máselesin sheshýge atsalysýdy surady.
«Sýmen qamtý máselesimen qazirgi ýaqytta jańadan qurylǵan mınıstrlik aınalysady. Presnov toraptyq sý qubyryn jańǵyrtý jumystary boıynsha qylmystyq is qozǵaldy. Osyǵan baılanysty esep komıteti bıyl oblysqa bir tıyn da bólmeýdi sheshti. Biraq biz aralasqannan keıin birinshi jáne ekinshi kezeńdi aıaqtaýǵa 500 mln teńge berildi. Bul jumystar oryndalǵannan keıin ǵana 2021 jyly Sergeev jáne Taıynsha baǵytyna 2,5 mlrd teńge bólinedi», - deıdi QR Parlamenti Senatynyń depýtaty Olga Perepechına.
Kásipkerler sondaı-aq mıneraldy tyńaıtqyshtarǵa sýbsıdııa alýda, maldy bordaqylaýda, jer ýchaskesin resimdeýde jáne aýyl sharýashylyǵy jumysshylaryna zeınetaqy taǵaıyndaýda kezdesetin túıtkilderdi ortaǵa saldy.
«Qazir aýyl sharýashylyǵy qurylymdarynyń jumysshylary zeınetke shyǵar kezde bir jyldyń tek birer aıy ǵana esepke alynady. Biz Salyq kodeksine saı barlyq tólemderdi 15 qarasha men 31 naýryz aralyǵynda jasadyq. Qazir zeınetaqyny eseptep shyǵararda tek osy aılar ǵana esepke alynady. Qurmetti depýtattar, osy máseleni anyqtasańyzdar eken», - dedi «Optımým Petro» JShS dırektory Raıl Mendeev.
Májilismen Káribaı Musyrman kásipkerdiń ótinishin óz baqylaýyna alyp, anyq-qanyǵyn bilýge ýáde etti.
