SQO-da kýáliginen aıyrylsa da mas kúıde qaıta rýlge otyrǵandar azaımaı tur
PETROPAVL. QazAqparat – Soltústik Qazaqstan oblysynda kólik basqarý quqyǵynan aıyrylsa da, mas kúıde rýlge otyrǵan 65 júrgizýshige qylmystyq is qozǵaldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń habarlaýynsha, Petropavldaǵy Internatsıonalnyı kóshesiniń boıynda patrýldik polıtsııa qyzmetkerleri «VAZ» avtokóligin toqtatqan. Kólikti 34 jastaǵy Qyzyljar aýdanynyń turǵyny basqarǵan. Medıtsınalyq kýálandyrý júrgizýshiniń alkogoldik masań kúıde bolǵandyǵyn kórsetti. Qujattardy tekserý barysynda onyń uqsas quqyq buzýshylyq úshin birneshe ret jaýapkershilikke tartylǵany anyqtaldy.
Ol osydan eki jyl buryn kólikti mas kúıde júrgizgeni úshin ákimshilik jaýapkershilikke tartylyp, 3 jylǵa júrgizýshi kýáliginen aıyrylǵan. Alaıda naýryz aıynda qaıta mas kúıde kólik aıdap qolǵa tústi. Onyń ústinen QR QK 346-babynyń 1-tarmaǵyna sáıkes qylmystyq is qozǵalǵan. Úshinshi márte ustalǵan Qyzyljar aýdanynyń turǵyny is sotqa jiberilgenge deıin ýaqytsha ustaý ızolıatoryna qamaýǵa alyndy.
Kólikti mas kúıde basqarǵandarǵa, ásirese buǵan deıin kólik basqarý quqyǵynan aıyrylǵan bolsa qatań jaza qoldanylady. QR Qylmystyq kodeksi 346-babyna sáıkes 200 AEK mólsherinde aıyppul tóleýi nemese 50 táýlikke deıin qamalýy tıis. Qazirgi ýaqytta 34 jastaǵy quqyq buzýshyǵa qatysty qylmystyq is sotqa qaraý úshin jiberildi.
SQO Polıtsııa departamenti bastyǵynyń orynbasary Eńbek Sembınniń sózine qaraǵanda, qatań jaza asa aýyr qylmystardyń aldyn alý úshin qajet. Óńirde mas júrgizýshilerdiń kinásinen 81 jol-kólik oqıǵasy tirkelgen. Saldarynan ondaǵan adamnyń densaýlyǵyna zııan kelip, túrli dene jaraqatyn aldy.
Jalpy oblysta jyl basynan júrgizýshi kýáliginen aıyrylyp, qaıta mas kúıde kólik júrgizgeni úshin 65 adam qylmystyq jaýapkershilikke tartyldy, barlyq is sotqa joldandy.
