SQO-da kýáligi joq bolsa da kólik tizgindegen 50-ge jýyq júrgizýshi anyqtaldy
PETROPAVL. QazAqparat - Soltústik Qazaqstan oblysynyń polıtseıleri úsh kún ishinde júrgizýshi kýáliginen aıyrylǵan 44 adamdy, kólik júrgizýge quqyǵy joq 50 turǵyndy toqtatty, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, óńirde «Kýáliksiz júrgizýshi» jedel-profılaktıkalyq sharasyna 500-ge jýyq polıtseı jumyldyrylǵan. Olar kólik basqarý quqyǵynan aıyrylsa da mashına júrgizgenderdi anyqtady.
«Audi V4» avtokóliginiń ıesi 33 jastaǵy petropavldyq 30 aılyq eseptik kórsetkish kóleminde aıyppul tóleıdi. Buryn mas kúıinde kólik júrgizgeni úshin 3 jylǵa júrgizýshi kýáliginen aıyrylǵan ol byltyr kúzde taǵy da rýlge otyrǵan. Oǵan sol kezde QR Ákimshilik quqyq buzýshylyq týraly kodeksiniń 612-babynyń 3-bóligi boıynsha 10 AEK kóleminde aıyppul salyndy. Bul joly ol dál osy baptyń 4-bóligi boıynsha jaýapkershilikke tartylady, ıaǵnı ol jaýapqa tartylǵan bir jyldyń ishinde zań buzýshylyqqa qaıta jol bergen.
«Jalpy jedel-profılaktıkalyq is-sharanyń 3 kúninde oblys joldarynda kólik basqarý quqyǵy joq - 50 jáne kólik júrgizý quqyǵynan aıyrylǵan - 44 júrgizýshi jaýapkershilikke tartyldy», - SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
Tártip saqshylarynyń aıtýynsha, operatsııa aıasynda 1,5 myńnan astam jol erejesin buzý faktileri anyqtaldy. Onyń ishinde 267-sinde júrgizýshi nemese salondaǵy jolaýshy qaýipsizdik belbeýin taqpaǵan, 168-inde júrgizýshil kólik tizgininde telefonmen sóılesken jáne 164-inde jyldamdyqty asyrǵan.
