SQO-da kitaphanalar QR-kod arqyly qyzmet kórsetip, oqyrmandardy onlaın tirkeıdi
PETROPAVL. KAZINFORM – Soltústik Qazaqstan oblysynda kitaphanalar tek kitap oqıtyn oryn ǵana emes, zamanaýı tehnologııalardy meńgerýge múmkindik beretin bilim berý jáne ınnovatsııalyq ortalyqtarǵa aınalyp jatyr.
SQO ákimdiginiń málimetinshe, óńirdegi aýqymdy tsıfrlyq transformatsııanyń bastaýynda Sábıt Muqanov atyndaǵy oblystyq ámbebap ǵylymı kitaphana tur. Jyl saıyn 300 myńnan astam oqyrman keletin kitaphana qorynda 750 myń dana kitap bar. Mekemege «RABIS» avtomattandyrylǵan aqparattyq-kitaphanalyq júıesi engizilip, «Qyzylzhar kitaphanasy» elektrondy kitaphanasy iske qosylǵan. Nátıjesinde ólketaný qorlary men sırek basylymdardy júıeli túrde tsıfrlandyrý jumystary júrgizilip jatyr. Oblys turǵyndary jergilikti jáne ulttyq tsıfrlyq resýrstarǵa kez kelgen jerden qol jetkize alady.
Byltyr óńirde elimizdegi alǵashqy kitaphanalyq neıroassıstent – «AI Zhan» iske qosyldy. Joba OpenAI tehnologııalary negizinde ázirlengen. Vırtýaldy kómekshi táýlik boıy jumys istep, oqyrmandarǵa kitap tańdaýǵa, elektrondy katalogtarmen jumys isteýge, tsıfrlyq qyzmetterdi meńgerýge kómektesedi.
Kitaphanalarda jasandy ıntellekt elementteri kitaptardy avtomatty ındeksteýde, tsıfrlyq arhıvter qurýda jáne ınteraktıvti jobalardy júzege asyrýda qoldanylyp jatyr. Máselen qazir Sábıt Muqanov murasyn nasıhattaýǵa arnalǵan tsıfrlyq jobalar, Shoqan Ýálıhanov pen Fedor Dostoevskıı arasyndaǵy hat almasýǵa arnalǵan ınteraktıvti bastamalar ázirlengen. Bul jobalar, uıymdastyrýshylardyń aıtýynsha, tarıhı murany zamanaýı formatta usynýǵa múmkindik beredi.
Kitaphana bazasynda «Meıkerspeıs» alańy jumys isteıdi. Munda jastar robototehnıka, 3D-modeldeý jáne vırtýaldy shynaıylyq tehnologııalaryn tegin meńgere alady.
Al bıyl qańtar aıynan bastap oblys kitaphanalaryna QR-kod arqyly qyzmet kórsetý júıesi engizilip, oqyrmandardy tirkeý onlaın formatqa kóshirildi. Bul kitaphana qyzmetin jedel ári qoljetimdi etti.
Qazir SQO-da 321 kitaphana jumys istep tur.
Buǵan deıin Almatyda táýlik boıy jumys isteıtin kitaphanalar sany artqanyn jazǵan edik.
