SQO-da KSRO pasportymen júrgen 6 adam jańa qujat aldy
PETROPAVL. QazAqparat – Soltústik Qazaqstan oblysynda qyzyl pasportpen júrgen 6 adam jańa qujat aldy, dep habarlaıdy QazAqparat tilshisi.
SQO-da áli kúnge eski qyzyl pasportty jańa jeke kýálikke aýystyrmaǵandar bar.
Polıtsııa departamenti baspasóz qyzmetiniń málimetinshe, Aqqaıyń aýdanynyń polıtsııa bólimine shalǵaıdaǵy Novorossııskoe eldimekeniniń 53 jastaǵy turǵyny júgingen.
Ol ýaqtyly qazaqstandyq tólqujat almaǵan, al burynǵy 1974 jylǵy úlgidegi eski tólqujatty joǵaltyp alǵan.
Kóshi-qon qyzmetiniń qyzmetkeri Mahabbat Seıitova qysqa merzim ishinde onyń azamattyǵyn rastap, tıisti rásimderdi júrgizdi. Aqpan aıynyń basynda aýyl turǵyny alǵash ret Qazaqstan azamatynyń jeke kýáligin aldy.
Sondaı-aq, polıtseıler oǵan sharýa qojalyǵyna mehanızator bolyp jumysqa ornalasýyna kómektesti. Er adam Instagram áleýmettik jelisinde tártip saqshylaryna alǵysyn jetkizdi.
SQO PD kóshi-qon qyzmeti basqarmasynyń bastyǵy Talǵat Ábilovtiń aıtýynsha, qańtar aıynyń ishinde kóshi-qon qyzmeti bólinisteri alty soltústikqazaqstandyqqa eski úlgidegi tólqujattardyń ornyna qazaqstandyq jeke kýálik bergen.
Ótken jyly SQO-nyń 47 turǵyny qyzyl tólqujattaryn qazaqstandyq jeke kýálikke aýystyrǵan.
Sonymen qatar, polıtseıler ne keńestik, ne qazaqstandyq qujat almaǵan 39 adamnyń quqyqtyq mártebesin retteýge kómektesti.
Tártip saqshylary KSRO tólqujatyn ýaqytynda aýystyrmaǵan, sondaı-aq áli kúnge týý týraly kýálikpen júrgen adamdardyń kóshi-qon qyzmetine júginýi qajet ekenin eske salady.
Ol jerde mamandar QR azamattyǵyn anyqtaý úshin qujattar jınaýda jan-jaqty kómek kórsetedi.
Qańtar aıy ishinde SQO-da 3177 adam qujattandyryldy.
