SQO-da QR aýmaǵynda qujatsyz turyp kelgen 5 359 azamat jaýapkershilikke tartyldy
PETROPAVL. KAZINFORM - SQO-da QR aýmaǵynda qujatsyz nemese tirkeýsiz turyp kelgen 5 359 azamat jaýapkershilikke tartyldy. Bul týraly SQO polıtsııa departamentiniń baspasóz qyzmeti málim etti.
Jaz — bul demalys ýaqyty ǵana emes, halyqaralyq tranzıt artatyn, sondaı-aq sheteldikterdiń eńbek kúshin paıdalaný jıileıtin maýsym. Shekaraǵa jaqyn Soltústik Qazaqstan oblysynda kóshi-qon jaǵdaıyn baqylaý polıtsııa departamenti jumysyndaǵy basym baǵyttardyń biri bolyp tabylady. Polıtseıler sheteldik azamattardyń jınalatyn oryndaryn, qurylys nysandaryn jáne basqa da oryndardy únemi tekserip otyrady.
«Maýsym aıynda polıtsııa qyzmetkerleri Jambyl aýdanynyń aýmaǵynda zańsyz eńbekpen aınalysý faktisin anyqtady. Salynyp jatqan obektide eńbektenip júrgen Ózbekstan Respýblıkasynyń bes azamatynyń jumys isteýge ruqsaty bolmaǵan. Nátıjesinde sheteldikterdi de, olardyń jumys berýshilerin de ákimshilik jaýapkershilikke tartý boıynsha sharalar qabyldandy. Sot sheshimimen sheteldik bes azamattyń barlyǵy Qazaqstan Respýblıkasynan shyǵaryldy», — delingen habarlamada.
SQO PD kóshi-qon qyzmeti basqarmasynyń bastyǵy polıtsııa polkovnıgi Talǵat Ábilovtiń aqparaty boıynsha, 6 aı ishinde halyqtyń kóshi-qony salasyndaǵy QR zańnamasyn buzǵany úshin 201 sheteldik jáne 38 jumys berýshi ákimshilik jaýapkershilikke tartyldy. Jyl basynan SQO-da kóshi-qon qyzmeti bólinisteriniń qyzmetkerleri Qazaqstan aýmaǵynda tirkeýsiz nemese jeke basyn kýálandyratyn qujattarsyz turǵany úshin 5359 azamatty ákimshilik jaýapkershilikke tartty. Sheteldikter men azamattyǵy joq adamdardy qabyldaıtyn jeke jáne zańdy tulǵalardyń tarapynan halyqtyń kóshi-qony salasyndaǵy zańnamany buzýdyń 302 deregi tirkeldi. El aýmaǵynan 57 sheteldik shyǵaryldy.
Quqyq buzýshylyqtardy anyqtaý men jolyn kesýden bólek, SQO PD kóshi-qon qyzmeti basqarmasy memlekettik qyzmetterdiń 12 túrin kórsetýdi jalǵastyrýda. Alty aı ishinde azamattyǵy joq 573 adam turýǵa yqtııarhat pen kýálikter alǵan. Jeke kýálik jasaýǵa 20054 ótinish jáne 12320 pasport rásimdeldi. Jyl basynan kóshi-qon qyzmeti QR-da ýaqytsha bolýǵa 3600-den astam ruqsat qaǵazyn berdi. Óńirdegi kóshi-qon jaǵdaıy erekshe baqylaýda.
