SQO-da kózi joıylǵan aýrý mal úshin 37 mln teńge ótemaqy tólendi
SQO Veterınarııa basqarmasynyń málimetinshe, óńirde epızootııalyq turaqtylyqty saqtaý maqsatynda janýarlar men qustardyń 9 asa qaýipti jáne 3 enzootııalyq aýrýlaryna qarsy profılaktıkalyq egýler júrgiziledi. Budan basqa byltyr 14 aýrýǵa dıagnostıkalyq jáne 2 aýrýǵa allergııalyq zertteýler júrgizilgen.
«Byltyr 5,4 mıllıonǵa jýyq mal qaýipti aýrýlarǵa qarsy egildi. Onyń ishinde sibir jarasy, qarasan, qutyrma, nodýlıarly dermatıt, pasterellez, jylqy rınopnevmonııasy, vırýstyq dıareıa, ınfektsııalyq rınotraheıt jáne qus tumaýy bar. Epızootııaǵa qarsy is-sharalardy júrgizýgi 182 mln 397 myń teńge qarjy bólindi, oǵan 3 mln 759 myń dana veterınarlyq preparat alyndy. Budan basqa 1 mln 450 myń zertteý júrgizildi», - deıdi SQO Veterınarııa basqarmasynyń basshysy Berik Áljanov.
Zertteý nátıjeleri boıynsha brýtsellezben aýyratyn 574 bas iri qara mal anyqtalǵan, bul 2020 jylǵa qaraǵanda 515 basqa az.
«Byltyr 3 iri qara malda týberkýlez, 40 malda leıkoz anyqtaldy. Jalpy, aýrý maldary joıylǵan turǵyndarǵa 402 bas úshin 37 mln teńge ótemaqy tólendi.
2020 jyly brýtsellez 13 eldi mekende anyqtalsa, byltyr tórteýge az boldy: Taýaǵash, Ploskoe, Bogolıýbovo, Tolmachevka, Kamyshlovo, Kóbensaı, Beskól, Penkovo, Shahovskoe eldi mekenderinde aýrý oshaǵy anyqtaldy», - deıdi Berik Áljanov.
Bıyl asa qaýipti aýrýlarǵa qarsy aldyn alý is-sharalarymen 5 633,7 myń mal qamtylady. Bul ótken jylmen salystyrǵanda 226,1 myń basqa artyq. Budan basqa shamamen 1,5 mln malǵa dıagnostıkalyq zertteýler júrgizilmek.
