SQO-da qoı sharýashylyǵyn damytýǵa arnalǵan baǵdarlama júzege aspaq
PETROPAVL. QazAqparat – Soltústik Qazaqstan oblysynda kásipkerler palatasynyń bastamasymen, «Shopan-ata» qoı ósirýshilerdiń ulttyq qaýymdastyǵynyń qoldaýymen qoı sharýashylyǵyn damytýǵa arnalǵan aýmaqtyq baǵdarlama júzege asady, dep habarlaıdy QazAqparat tilshisi.
SQO ákimi Qumar Aqsaqalov búgin qoı sharýashylyǵyn damytýǵa arnalǵan aýmaqtyq baǵdarlamany resmı túrde iske qosty.
Qańtar aıynda SQO-ny damytýdyń aýmaqtyq kartasyn talqylaý kezinde «Atameken» Qazaqstan Respýblıkasy Ulttyq kásipkerler palatasynyń Basqarma Tóraǵasy Abylaı Myrzahmetov óńirdiń qoı sharýashylyǵyn damytýda áleýeti joǵary ekenin aıtty. Qazir oblysta shopan ata tólin ósirýmen 207 sharýashylyq aınalysady. Al olardyń ishinde asyl tuqymdy qoı basyn kóbeıtýdi sanaýly ferma – «Ekpin» JShS, «Qaratomar» JShS, «Anar» JShS, «Man» ShQ qolǵa alǵan.
SQO ákimdiginde óńir basshysy Qumar Aqsaqalovtyń tóraǵalyǵymen qoı sharýashylyǵyn damytý máselelerine arnalǵan jıyn ótti. Oǵan kásipkerler palatasynyń, «Shopan-ata» qoı ósirýshilerdiń ulttyq qaýymdastyǵynyń ókilderi, oblystyq atqarýshy organdardyń, qarjy uıymdarynyń mamandary, aýdan ákimderi jáne qoı ósirýmen aınalysatyn kásipkerler qatysty.
Qoı sharýashylyǵyn damytýdyń aýmaqtyq baǵdarlamasy 2030 jylǵa deıin shaqtalǵan.
«Baǵdarlama aıasynda qoı basy úsh ese kóbeıip, 10 jyldyń ishinde 1,6 mln-ǵa jetedi. Qoı ósirýge aýylsharýashylyǵy taýar óndirýshilerin jáne 20 myń jeke qosalqy sharýashylyqtardy tartý kózdelgen. Bul baǵyttyń bolashaǵy zor. Qazirdiń ózinde qoı etiniń kelisin 5,5 AQSh dollaryna, ıaǵnı 2300 teńgege eksporttaýǵa bolady. Sondaı-aq ishki naryqty sapaly, qymbat emes etpen qamtımyz. Nátıjesinde óńirde jańa et óńdeý kásiporyndary ashylady. Bordaqylaý alańdary men asyl tuqymdy ortalyqtar paıda bolady», - deıdi «Atameken» UKP atqarýshy dırektory Erbol Eseneev.
Aldyn ala boljam boıynsha, bıyl qoı sany 8 %-ǵa nemese 28 myńǵa kóbeımek. Ol úshin bul salany eki baǵytta damytý usynyldy. Birinshisi – kásipkerlerge asyl tuqymdy analyq qoıdy satyp alýǵa taýarlyq nesıe usyný. Ekinshisi - óz ýchaskesinde 50-100 qoı asyraı alatyn jeke qosalqy sharýashylyqtary barlarǵa qoldaý kórsetý.
Jalpy baǵdarlamany júzege asyrý úshin qarjylandyrýdyń birneshe mehanızmi bar. Sonyń biri – «Eńbek» baǵdarlamasy arqyly. Aýyl sharýashylyǵyn qarjylaı qoldaý qory arqyly 7 jylǵa 6 %-ben jeńildetilgen nesıe berý. Sondaı-aq «Soltústik» áleýmettik-kásipkerlik korporatsııasy arqyly qoı alýǵa 2-4 % jyldyq mólsherlememen jáne 1 jyl demalyspen taýarlyq nesıe berý. Budan basqa bıyl SQO kásipkerler palatasynyń qatysýymen «Atameken-Qyzyljar» shaǵyn qarjy uıymy jumysyn bastaıdy. Osylaısha, «Bastaý Bıznes» arqyly oqyp shyqqandar qoı sharýashylyǵyn damytýǵa 6 %-ben 7 jylǵa deıin jeńildetilgen nesıe ala alady.
Kásipkerler palatasy baǵdarlamaǵa qyzyǵýshylyq tanytyp, qatysýǵa nıet etkenderge jan-jaqty qoldaý kórsetpek.
