SQO-da qostanaılyqtarǵa kómek jınaıtyn 14 pýnkt bar, alǵashqy kólik jolǵa shyqty

PETROPAVL. QazAqparat – Soltústik Qazaqstan oblysynda órtten zardap shekken qostanaılyqtarǵa kómek kórsetý úshin barlyq aýdan ortalyqtarynda jáne Petropavlda arnaıy pýnktiler ashylǵan, dep habarlaıdy QazAqparat tilshisi.

«AMANAT» partııasy SQO fılıaly baspasóz qyzmetiniń málimetinshe, gýmanıtarlyq kómekti qabyldaý pýnktileri partııanyń barlyq fılıaldarynda búgin tańerteń ashyldy.

Qostanaı oblysynda bolǵan órtten zardap shekkender úshin turǵyndar gıgıenalyq zattardy, kórpe-jastyq, kıim-keshek jáne uzaq ýaqyt búlinbeı saqtalatyn azyq-túlik – un, makaron ónimderin, shaı, tuz, kúrish, taǵy basqa taǵamdardy tapsyryp jatyr. Zattardy «Jastar Rýhy» jastar qanatynyń volonterleri qabyldaıdy.

«Tańǵy saǵat 8:00-den bastap jumys istep jatyrmyz. Depýtattar, qoǵam ókilderi, partııalyqtar kómektesip jatyr. Búgin saǵat 20:00-de Qostanaıǵa alǵashqy kómekti jónelttik», - deıdi «Jastar Rýhy» JQ SQOF tóraǵasy Birjan Qudaıbergenov.

Alǵashqylardan bolyp kómek qolyn sozǵandardyń biri – Qaıyrjan Aısın. Petropavl turǵynynyń pikirinshe, qıyn sátte eldikti kórsetý – paryz.

«Men naqty ispen kómekteskim keldi. Ózimdi bir mezette úısiz-kúısiz qalǵandardyń ornyna qoısam, denem túrshigedi. Osyndaı ýaqytta qazaqstandyqtar birlik tanytýlary kerek. Barshańyzdy kómek kórsetýge shaqyramyn», - deıdi ol.