SQO-da qosymsha 5 myńnan astam balaǵa qyzylshaǵa qarsy vaktsına egildi

Soltústik Qazaqstan oblysynda qyzylshamen aýyrǵandardyń sany 200-ge jetti, onyń 107-sy zerthanalyq jolmen rastaldy. Infektsııany juqtyrǵandardyń basym bóligi Petropavl turǵyndary, dep habarlaıdy Kazinform.

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, Petropavlda 94 adam, Aıyrtaý, Qyzyljar, Mamlıýt jáne Maǵjan Jumabaev aýdandarynda ekiden jáne Aqqaıyń jáne Jambyl aýdandarynda jekelegen jaǵdaılar tirkelgen.

«14 jasqa deıingi 40 bala aýyrdy, 15-19 jas aralyǵyndaǵy 28 adam syrqattandy. QR Ulttyq ulany akademııasynda aýyrǵandar sany 47-ge jetti. Borkıdegi Soltústik Qazaqstan kásibı-pedagogıkalyq kolledjde 21 stýdentte qyzylsha anyqtaldy, onyń bireýi zerthanalyq rastaldy. Úsh medıtsına qyzmetkeri, muǵalim, áskerı qyzmetshi jáne zeınetker juqtyrdy.

Qyzylshamen aýyrǵandardyń 93% egilmegen, onyń ishinde 22 jaǵdaıda jeke senimi boıynsha bas tartqan», - deıdi Arman Kúshbasov.

Qazirgi ýaqytta oblysta qyzylshaǵa qarsy 7 myńǵa jýyq doza bar.

«Qyzylshaǵa qarsy qosymsha jappaı ımmýndaý naýqany bastalǵaly 5380 balaǵa ekpe egildi. Bul bar jospardyń 20,5%.

Osy jyldyń naýryz aıynan bastap qyzylshaǵa qarsy ımmýndaýdy tolyqtyrý barysynda buryn vaktsınatsııalanbaǵan, vaktsınatsııa mártebesi belgisiz jáne bas tartqan 5239 adamnyń ishinen 18 jasqa deıingi balalardyń 2355 nemese 44,4% egildi», - deıdi Arman Kúshbasov.