SQO-da kóshpeli ekpe pýnktteri jumys istep jatyr
PETROPAVL. QazAqparat – Soltústik Qazaqstan oblysynda koronavırýsqa qarsy vaktsına saldyrýǵa nıet etkenderdiń sany artty. Aýyl turǵyndaryna ekpe egý úshin kóshpeli ekpe pýnktteri jumys istep jatyr, dep habarlaıdy QazAqparat tilshisi.
SQO densaýlyq saqtaý basqarmasy baspasóz qyzmetiniń málimetinshe, koronavırýs vaktsınasynyń 1-komponentin osy kúnge deıin 14 644 adam salǵyzǵan. Qazir kúnine jańadan 3 myńǵa jýyq adam ekpe alady.
«Turǵyndar arasynda koronavırýsqa qarsy ekpeni alýǵa degen suranys artyp otyr. Halyq ekpe alýdyń qajettiligin túsingen. Aýyl turǵyndary da belsendilik tanytyp jatyr. Eger de belgili bir aýylda vaktsına saldyrǵysy keletin adamdardyń sany 50-den assa, ol eldi mekenge kóshpeli egý pýnkti shyǵady. Mundaı pýnktter Petropavlda da jumys istep jatyr.
Medıtsınalyq qyzmetkerler mekemelerge baryp, vaktsına egedi», - deıdi SQO densaýlyq saqtaý basqarmasynyń baspasóz hatshysy Gúlnar Qalıeva.
Oblystyń aımaqtary boıynsha ekpe alýdan 876 adammen Taıynsha aýdany, 814 adammen M.Jumabaev jáne 789 adammen Ǵabıt Músirepov atyndaǵy aýdandar alda keledi. Jalpy SQO boıynsha vaktsınany tolyq alǵandardyń sany - 2683.
Mamandardyń aıtýynsha, qazir óńirde 50 ekpe egý pýnkti ashylǵan. Qajettilik týyndaǵan jaǵdaıda onyń sanyn 80-nen asyrýǵa múmkindik bar.
