SQO-da kóshi-qon zańnamasyn buzýdyń 800-den astam deregi anyqtaldy
PETROPAVL. QazAqparat – Soltústik Qazaqstan oblysynda polıtseıler kóshi-qon qyzmetine qatysty zańnamany buzýdyń 804 deregin anyqtady, 45 sheteldikti elden shyǵarýǵa sot sheshim qabyldady, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, bıyl 7 aıda kóshi-qon qyzmeti zańnamasyn buzýǵa qatysty anyqtalǵan 804 derektiń 655-i - sheteldikterdiń elde bolý merzimderin buzýyna, 149 fakti – sheteldikterdiń el aýmaǵynda zańsyz jumys isteýine qatysty. Osyǵan oraı 28 jumys berýshi jaýapkershilikke tartyldy.
Sonymen qatar, 624 zańdy jáne jeke tulǵa polıtsııaǵa sheteldikterdiń bar ekendigin ýaqtyly habarlamaǵany úshin jazalandy. Qaıyr surap, jurttyń mazasyn alǵany úshin 2 sheteldik jaýapqa tartyldy. Sot kóshi-qon zańnamasyn buzǵandardy elden shyǵarý týraly 45 sheshim shyǵarǵan. Polıtsııa qyzmetkerleri el aýmaǵynan ketý týraly sot sheshimin oryndaýdan jaltarǵan 3 sheteldikti anyqtady.
Kúndelikti polıtsııa qyzmetkerleri sharýa jáne fermer qojalyqtaryn, aýyl sharýashylyǵy kásiporyndaryn, qurylys nysandaryn, bazarlar, vokzaldar men sheteldikterdiń bolýy yqtımal ózge de jerlerdi tekseredi. Maqsaty – sheteldikter tarapynan kóshi-qon qyzmeti zańnamasynyń buzýdy anyqtaý jáne jolyn kesý, sondaı-aq sheteldik jumys kúshin zańsyz paıdalaný faktilerin anyqtaý.
«Kóbinese sheteldikter tirkeý merzimin ótkizip alady nemese olardy qabyldaıtyn tarap ózderinde júrgen sheteldikter týraly kóshi-qon qyzmetine ýaqtyly habarlamaıdy. Qazaqstan Respýblıkasynda tirkeýsiz 30 kún bolýyna ruqsaty bar shetel azamattary tirkelýge ýaqyt bar dep júrip alady. Alaıda, bul qate pikir: zańnamaǵa sáıkes sheteldik birden tirkelýi qajet, keshigý – sot sheshimine sáıkes eskertýge, aıyppul tóleýge nemese elden shyǵarýǵa ákep soǵady. Sheteldikter arasynda quqyq buzýshylyqtardy anyqtaý boıynsha jumys jalǵasqan», - deıdi SQO PD Kóshi-qon qyzmeti basqarmasy bastyǵynyń orynbasary Ermek Nusyrbaev.
