SQO-da kóshi-qon zańnamasyn buzǵan 16 shetel azamaty elden shyǵaryldy
PETROPAVL. QazAqparat - Sheteldikterdiń tarapynan jasalatyn negizgi tártip buzýshylyq Qazaqstanǵa zańsyz kelý jáne elden shyǵý, dep habarlaıdy QazAqparat tilshisi SQO Polıtsııa departamentiniń baspasóz qyzmetine silteme jasap.
Óńirdiń Kóshi-qon qyzmeti basqarmasy «Mıgrant» jedel-profılaktıkalyq is-sharasyn qorytyndylady.
«Petropavl qalasyndaǵy qurylys nysandarynyń birinde zańsyz jolmen nápaqasyn taýyp júrgen Ózbekstan Respýblıkasynyń 5 azamatyn anyqtady. Sheteldikter Qazaqstan aýmaǵyna qańtar aıynyń basynda jeke maqsatpen kelgenin aıtyp engen. Alaıda, aqsha tappaq bolyp, kóshi-qon zańnamasyn buzdy. Olarǵa qatysty QR Ákimshilik quqyq buzýshylyqtar týraly Kodeksiniń 517-babynyń 5-bóligi boıynsha hattamalar toltyryldy. Sondaı-aq, olar ákimshilik qamaýǵa alyndy», - delingen habarlamada.
Departament deregine súıensek, tártip saqshylary qurylys nysandarynan bólek, bazarlar men saparjaıdy, sol sııaqty sheteldikterdiń toptasyp qonystanǵan oryndaryn teksergen. 5 kúndik sharanyń nátıjesinde shetel azamattarynyń Qazaqstan aýmaǵynda bolý erejelerin buzýynyń 259 faktisi anyqtaldy. Oblystyń sottyń qaýlysymen el aýmaǵynan 16 shetel azamaty shyǵaryldy.
SQO Polıtsııa departamenti Kóshi-qon qyzmeti basqarmasynyń bastyǵy, polıtsııa maıory Talǵat Ábilovtiń aıtýynsha, ótken jyly soltústikqazaqstandyq saqshylar 5 jedel-profılaktıkalyq is-sharasyn ótkizdi.
«Olardyń úsheýi - respýblıkalyq kólemde uıymdastyryldy. Júrgizilgen jumystardyń nátıjesinde 3 myńnan astam sheteldik azamat ákimshilik jaýapkershilikke tartyldy. Sottyń sheshimimen 189 sheteldik elden shyǵaryldy. Olardyń jumys kúshin zańsyz qoldanǵan 100 jumys berýshi jaýapqa tartyldy. Sondaı-aq, 12 aıdyń qorytyndysy boıynsha memlekettik shekarany zańsyz jolmen kesý, el aýmaǵynan shyǵarý týraly sot sheshimin oryndamaý men zańsyz kóshi-qon uıymdastyrý boıynsha 44 qylmystyq is qozǵaldy. Zańsyz kóshi-qonǵa qarsy jumystar jalǵasýda», - deıdi ol.
