SQO-da kósheden tabylǵan áıeldiń týǵan-týystary izdestirilip jatyr
PETROPAVL. QazAqparat – Soltústik Qazaqstan oblysynda polıtseıler men volonterler birneshe kúnnen beri esin joǵaltqan áıeldiń týǵan týystaryn taba almaı jatyr, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 10 sáýir kúni Aqjar aýdanynan Ýálıhanov aýdanynyń ortalyǵy Kishkenekólge qujattary joq egde jastaǵy áıel jetkizildi.
Umytshaqtyq aýrýymen aýyratyn ol ózin túrlishe atap, týǵan jyly men turatyn jerin aıta almaǵan.
Medıtsınalyq mekemege ornalastyrylǵannan keıin áıel týraly aqparat polıtseıler men volonterlerge jiberildi.
Qazirgi ýaqytta aýdandyq polıtsııa bóliminiń qyzmetkerleri áıeldiń jeke tulǵasyn anyqtaý úshin ol aıtqan málimetterdi tekserip jatyr.
Áıeldiń qaıdan shyǵyp, qaıda bara jatqany belgisiz.
«Lider.kz» volonterler qozǵalysynyń ókilderi áleýmettik jelilerde tabylǵan áıelge qatysty aqparat taratyp, onyń tanys, týystaryn izdestirip jatyr, alaıda ázirge nátıje joq.
Qozǵalys úılestirýshisi Krıstına Ashpekovanyń aıtýynsha, óńir turǵyndary áıelge osy ýaqytqa deıin kómektesip kelgen.
Onyń biri ýaqytsha úılerine turǵyzsa, endi biri oblys aýmaǵynda kólikterine otyrǵyzyp, eldi mekenderge jetkizip salǵan.
«Qazirgi ýaqytta áıeldiń jeke tulǵasyn anyqtaý maqsatynda jumys júrgizilip jatyr. Baǵdarlar qalalyq basqarma bólinisterine jáne aýdandyq polıtsııa bólimderine, Reseı Federatsııasynyń shekaralas aımaqtaryna jiberildi. Tek naqty málimetterdi biletin azamattardy habarlasýdy suraımyz. Volonterlerdiń izdestirý jumysyndaǵy úlesin atap ótken jón, olardyń iz-túzsiz joǵalǵandardy izdestirýde kómekteri zor», - deıdi SQO PD Krımınaldyq polıtsııa basqarmasynyń bastyǵy Marat Jumalıev.
