SQO-da kórshi aýylǵa barmaq bolǵan er adam boranda adasyp qaldy
PETROPAVL. QazAqparat – Soltústik Qazaqstan oblysynda kórshi aýylǵa barmaq bolyp borandy kúni jolǵa shyqqan er adam adasyp ketti. Turǵyndy qutqarýshylar aman-esen taýyp aldy, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oqys oqıǵa 31 qańtarda bolǵan. Saǵat túngi 22.30 shamasynda oblystyq tótenshe jaǵdaı departamentiniń jedel kezekshisine boranda adasyp ketken er adam habarlasqan. Ol Aqsýat eldi mekeninen Esil aýylyna tas jolmen jaıaý shyqqanyn, biraq bastalǵan borannan joldan adasyp ketkenin aıtqan. Kómek surap, óz betimen úıge jete almaıtynyn jetkizgen.
Tótenshe jaǵdaı týraly aqparat Tımırıazev aýdandyq tótenshe jaǵdaılar bólimine jetisimen birden izdeý sharalary bastaldy. Qutqarýshylar izdeýdi 2 aýyldy baılanystyratyn tas joldan bastady.
«Tún, ári boran jumysymyzdy qıyndatty. Biraq, er adam joldan alysqa uzamaǵandyqtan, onyń izine túse aldyq. Boranda adasqan turǵyn da bizge barynsha kómektesip, uıaly telefonmen únemi baılanysta boldy. Baǵdarlaýǵa tyrysty», - deıdi aýdandyq tótenshe jaǵdaılar bóliminiń aǵa ınjeneri Abaı Setaqov.
Borandy túnde adasqan er adam, Esil eldi mekeniniń 50 jastaǵy turǵyny eken. Ol sol túni saǵat 1.25 mınýt ketkende Aqsýat aýylynan 8 shaqyrym jerden tabyldy.
Jalpy bıylǵy qysta SQO-da 54 daýyldy eskertý jarııalandy, izdestirý-qutqarý jumystary nátıjesinde 4 adam qutqaryldy.
