SQO-da koronavırýstyń aldyn alý maqsatynda arnaıy jospar ázirlendi
PETROPAVL. QazAqparat – Soltústik Qazaqstan oblysynyń ákimdiginde bolǵan otyrysta koronavırýstyń taralýynyń aldyn alý sharalary qarastyryldy, dep habarlaıdy QazAqparat.
Oblys ákimi Qumar Aqsaqalov aımaqta koronavırýstyń taralýyn boldyrmaý maqsatynda jospar ázirlengenin atap ótti. Shekaradan ótkizý beketterinde baqylaý kúsheıtilgen, oblysqa basqa memleketterden kelgen barlyq adamǵa monıtorıng jasalýda. Dárilermen qamtamasyz etý úshin qosymsha qarjy bólingen.
«Biz tehnıkalyq jaǵynan daıynbyz. Resýrstar bar. Aýdanymyzda qaýip-qater anyqtalǵan jaǵdaıda áreketter algorıtmi jasaqtaldy. Endi barlyq memlekettik organdardyń, kásipkerlik sýbektileriniń basshylary qarapaıym erejelerdi saqtaýy kerek. Eń aldymen, gıgıena, úı-jaılardy jeldetý qajet. Basshylar qolastyndaǵylarynyń biri aýrýǵa shaldyqqan jaǵdaıda olardyń medıtsınalyq mekemelerde teksrilgen-tekserilmegenin baqylap, densaýlyǵyn qadaǵalap otyrýy kerek», - dedi Q.Aqsaqalov.
Aımaq basshysy vırýstyń jańa túri órship turǵan, qaýiptiligi joǵary elderge barýdy josparlap otyrǵan turǵyndarǵa abaı bolýdy eskertti.
«Alda demalys, merekeler kele jatyr. Keıbir týrfırmalar vırýs juqtyrý qaýpi joǵary elderge barýǵa jarnama jasaýda, bul – olardyń quqyǵy. Alaıda balalarmen, otbasymen birge shyǵyp, qaýip tónip turǵanyn taǵy da oılaný kerek. Týrıstik joldamalardyń baǵasy tómendep ketkenin bilemiz. Biraq qaýiptilikti eskerý qajet. Barlyq máselege túsinistikpen qaraýlaryńzdy suraımyn», - dep atap ótti Q.Aqsaqalov.
