SQO-da koronavırýsty juqtyrǵandardyń úshten biri toı-tomalaqta bolǵan
PETROPAVL. QazAqparat – Soltústik Qazaqstan oblysynda qaýipti vırýsty juqtyrǵandar sany artyp keledi. Sonyń saldarynan 5 aýdan men 2 eldimekenge kirip-shyǵýdy shekteýge týra keldi, dep habarlaıdy QazAqparat tilshisi.
SQO-da karantın talaptaryn qatańdatýǵa qatysty búgin oblystyń bas sanıtar dárigeri Serikbaı Qasmaqasovtyń qatysýymen onlaın brıfıng ótti.
Serikbaı Qasmaqasovtyń aıtýynsha, óńirde koronavırýsty ınfektsııaǵa qatysty jaǵdaı turaqsyz. Osy ýaqytqa deıin vırýsty juqtyrýdyń 711 deregi tirkelse, onyń 40% - 287 adam dárigerlerge aýyryp qaralǵan. Búginde syrqattar óńirdiń barlyq aýdandary men Petropavl qalasynda tirkeldi.
«Sońǵy úsh kúnde aýyrǵandar boıynsha ósim 46%, ıaǵnı 216 adam. Syrqattanǵandardyń úshten biri naýqastarmen qarym-qatynasta bolǵan. Epıdemıologııalyq tergeý barysynda vırýstyń túrli otbasylyq merekelerde – qudalyq, toı jáne batalarda kóptep juǵatyny anyqtaldy. Otbasylyq is-sharalardy ótkizýge tyıym salynǵanymen, onyń qaýipti ekeni únemi aıtylyp jatqanymen kópshilik bul máselege áli kúnge mán bermeı keledi», - deıdi oblystyń bas sanıtar dárigeri.
Qazir SQO-da epıdemıologııalyq jaǵdaıdyń nasharlaýyna baılanysty Aıyrtaý, Aqjar, Ǵabıt Músirepov, Taıynsha, Ýálıhanov aýdandary jáne Jańajol men Taman eldimekenderi karantınge jabylǵan. Blokpostar qoıylyp, kirip-shyǵý shekteldi.
Іndettiń kóptep taralýyna tosqaýyl qoıý maqsatynda SQO-da demalys kúnderi karantındik shekteý sharalary kúsheıtilmek.
«Buǵan deıin arqany keńge salyp, ınfektsııanyń barlyǵyna shúbá keltirgender endi qaýiptiń barlyǵyna kúmán keltirmeıdi dep oılaımyn. Biz barlyǵymyz sanıtarlyq talaptardy qatań saqtaýymyz qajet. Qoǵamdyq oryndarǵa, saltanatty is-sharalarǵa, ásirese balalarmen barmańyzdar. Áleýmettik ara qashyqtyqty saqtap, maska taǵyńyzdar. Qoldaryńyzdy jıi sabyndap jýyp, deneńizdiń, otbasy músheleriniń temperatýrasyn jıi ólsheńizder. Barlyǵymyz birigip kúreskende ǵana qaýipti indetti joıamyz», - dedi Serikbaı Qasmaqasov.
