SQO-da koronavırýsty juqtyrǵandar sany artyp keledi
PETROPAVL. QazAqparat – Soltústik Qazaqstan oblysynda koronavırýs ınfektsııasyn juqtyrǵandar sany artyp keledi. Ótken táýlikte óńirde jańa 73 jaǵdaıy tirkeldi, dep habarlaıdy QazAqparat tilshisi.
SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, 13 shilde kúni koronavırýsty juqtyrýdyń 73 jaǵdaıy tirkeldi. Budan bir kún buryn syrqattanǵandar sany 55 bolǵan edi.
«Syrqattanǵandardyń 31-i Petropavlda, 13-i Aıyrtaý aýdanynda, 7-ýi Taıynsha, 6-ýy Jambyl, 5-eýi Qyzyljar aýdandarynda tirkeldi. 13 aýdannyń tek úsheýinde ǵana aýrýdyń jańa jaǵdaılary bolǵan joq. 73 syrqattyń 67-sinde aýrý belgileri bolǵan. Epıdemıologııalyq kórsetkishter boıynsha 72 azamattan jáne epıdqadaǵalaý maqsatynda 1 azamattan PTR ádisimen zerthanalyq taldaýlar alyndy», - deıdi departamenttiń bas mamany Aınash Saǵandyqova.
Oblysta PTR zertteýler júrgizetin 4 zerthana jumys isteıdi. Pandemııa bastalǵaly SQO boıynsha KVI-ǵa 379 myńnan astam zertteý júrgizildi. Olardyń 4,1 %-ynda, 16 myńǵa jýyq adamda test oń nátıjeni kórsetken. Ótken táýlikte PTR ádisimen 1276 zertteý júrgizildi.
Jalpy óńirde KVI juqtyrǵandar sany 15748-ge jetti. Onyń 449-y nemese 3 %-y syrttan ákelingen. Juqtyrǵandardyń 64 %-ynda aýrý belgileri bolǵan.
Esterińizge salaıyq, SQO-da búginnen bastap karantındik shekteýler kúsheıtilip, kóptegen nysannyń jumys kestesine ózgeris engizildi.
