SQO-da koronavırýstan emdelip jatqan árbir onynshysy naýqas jansaqtaý bólimine túsedi
PETROPAVL. QazAqparat – Petropavldaǵy ınfektsııalyq statsıonarlarda em alyp jatqandardyń ortasha jasy – 60-tan asqandar. Qosymsha dertteri bar bul naýqastardyń shamamen ár onynshysy jansaqtaý bóliminen ótedi, dep habarlaıdy QazAqparat tilshisi.
Petropavl qalalyq kópsalaly aýrýhananyń bas dárigeri Janna Maýytovanyń aıtýynsha, «Ózińizdi kútińiz, jaqynyńyzǵa janashyr bolyńyz!» dep bekerden aıtylmaǵan. Aýrýhana janynan ashylǵan ınfektsııalyq statsıonarda em alyp jatqan aýyr haldegi naýqastardyń ortasha jasy – 60-65 aralyǵynda. Bul adamdardyń qosymsha túrli dertteri bar. Qant dıabeti, arterııalyq gıpertenzııa, júrek aýrýlary – munyń bári koronavırýs juqqan kezde asqynyp ketedi.
«Koronavırýs ınfektsııasy áli kúnge tolyq zerttelip bolǵan joq. Bul aýrýmen kúreske biz árıne shilde aıymen salystyrǵanda, qazir aıtarlyqtaı daıynbyz. Tájirıbe jınadyq. Búkilálemdik densaýlyq saqtaý uıymynyń ádistemelik usynystaryn, elimizde ázirlengen emdeý protokoldaryn nazarda ustap otyramyz. Biz qazir bul aýrýmen kúreske daıynbyz», - deıdi Janna Maýytova.
Petropavl qalalyq kópsalaly aýrýhana janynan maýsym aıynda ınfektsııalyq bólim ashyldy. Ol bastapqyda provızorlyq statsıonar qyzmetin atqardy.
«KVI-men baılanysty qazirgi jaǵdaıda 15 qyrkúıekten bastap 100 orynǵa shaqtalǵan bizdiń bólim ınfektsııalyq statsıonarǵa aýystyryldy. Ol koronavırýs juqtyrǵan jáne qaýipti ınfektsııa juqtyrý kúdigi bar syrqattardy qabyldaıdy. Jansaqtaý, qarqyndy emdeý palatalary da ashylǵan. Jalpy statsıonar ashylǵaly 1 myńnan astam adam em aldy. Olardyń 9,5 % jansaqtaý bóliminen ótti», - deıdi aýrýhananyń bas dárigeri.
Mamannyń aıtýynsha, ázirge ınfektsııalyq statsıonarda jumys qalypty. Syrqattardyń kúrt ósýi baıqalmaǵan.
«Bastapqyda halyqtyń bul aýrý jaıynda túsinigi az boldy, tipti keıbireýleri senbedi de. Sol sebepti oıyn-toılar, túrli jıyndar eskertýlerge qaramastan uıymdastyrylyp keldi. Qazir mundaı jaǵdaı anaǵurlym azaıdy. Jalpy ınfektsııa degenimiz – aýrýdyń bir adamnan birneshe adamǵa juǵýy. Eger de biz bul tizbekti toqtata alsaq, ári qaraı taralýyna jol bermesek, aýrýmen kúres nátıjeli bolady», - deıdi Petropavl qalalyq kópsalaly aýrýhananyń bas dárigeri Janna Maýytova.
