SQO-da koronavırýstan bir adam jazylyp shyqty
PETROPAVL. QazAqparat – Soltústik Qazaqstan oblysynda koronavırýs juqtyrǵan alǵashqy naýqas emdelip shyqty. Bul jaıynda búgin óńirlik kommýnıkatsııalar qyzmetinde densaýlyq saqtaý basqarmasynyń jetekshisi Tımýr Sultanǵazıev aıtty, dep habarlaıdy QazAqparat tilshisi.
Juqpaly indetten táýir bolǵan - Petropavl qalasynyń turǵyny. Endi ol 14 kún dárigerlerdiń baqylaýyna alynyp, úı karantıninde otyrady.
«Búginde ınfektsııalyq statsıonarda 24 adam jatyr. Olardyń jaǵdaılary jaqsy. Aýrýdyń klınıkalyq belgileri joq, dene qyzýy qalypty. Juqtyrǵandardyń basym bóligi ınfektsııany tasymaldaýshy, sol sebepti jaǵdaılary qalypty. Emdeý hattamasyna saı emdik is-sharalar júrgizilip jatyr», - dedi Tımýr Sultanǵazıev.
Budan basqa provızorlyq statsıonarda 68 adam jatyr. Olar jedel respıratorlyq vırýstyq ınfektsııa belgilerimen túskender, biraq olarda koronavırýs ınfektsııasy anyqtalmaǵan. Karantındik statsıonarlarda 230 adam bar. Olardyń basym bóligi – juqpaly indetti juqtyrǵandarmen jaqyn qarym-qatynasta bolǵandar. Úı karantıninde 1137 adam otyrsa, dárigerler taǵy 266 adamdy qashyqtan baqylaýǵa alǵan.
«Qosymsha taǵy 10 reanımatsııalyq oryn ázirledik. Eksperttik klassqa jatatyn 5 jasandy tynys alý apparaty alyndy. Bul jumystar jaǵdaıy aýyr naýqastar túsetin bolsa aldyn ala daıyn otyrý úshin atqaryldy», - dedi Tımýr Sultanǵazıev.
