SQO-da koronavırýspen kúreske 1 mlrd 475 mln teńge bólingen

Búgin «Áleýmettik medıtsınalyq saqtandyrý qory» KEAQ oblystyq fılıalynyń dırektory Larısa Gordeeva brıfıng barysynda qarjynyń qaıda jumsalyp jatqanyn aıtyp berdi, dep habarlaıdy QazAqparat tilshisi.

Larısa Gordeevanyń sózinshe, medıtsınalyq saqtandyrý qory koronavırýsty emdeý jáne aldyn alý jónindegi barlyq is-sharalardy qarjymen qamtamasyz etedi. SQO-da qaýipti vırýspen kúresýge barlyǵy 1 mlrd 475 mln astam teńge bólindi. Onyń 339 mln teńgesine 23 emdeý mekemesimen halyqty emdeýge, sonyń ishinde statsıonarlarǵa jatqyzýǵa kelisim jasaldy. 983 mln teńgesi erekshe eńbek jaǵdaıynda jumys istep jatqan medıtsına qyzmetkerlerine ústemeaqy retinde beriledi. Budan basqa PTR-dıagnostıkaǵa 173 mln teńgeniń sharttary jasalǵan.

«Naýryz-maýsym aılary úshin Qor jetkizýshilerge, ıaǵnı emdeý mekemelerine kórsetken qyzmetter úshin jáne erekshe jaǵdaıda jumys istegen medıtsına qyzmetkerlerine ústemeaqy retinde shamamen 858 mln teńge tóledi. Bul karantınniń basynda bólingen somadan joǵary», - deıdi «Áleýmettik medıtsınalyq saqtandyrý qory» KEAQ SQOF dırektory Larısa Gordeeva.

Naýryz-maýsym aılarynda óńirdegi statsıonarlarda koronavırýs pen pnevmonııadan 882 naýqas emdeldi.

«Qor provızorlyq statsıonardaǵy árbir tósek-kún úshin 22 myń teńgeden astam, táýlik boıǵy statsıonarlar úshin – 32 myń teńgeden astam, anestezıologııa, reanımatsııa jáne qarqyndy terapııa bólimshesinde naýqasty emdegen bir kún úshin 70 myń teńgege jýyq qarjyny emdeý mekemelerine tóleıdi. Budan basqa medıtsınalyq uıymdarǵa koronavırýstyq ınfektsııany dıagnostıkalaý, emdeý jáne onyń asqynýlaryna baılanysty barlyq shyǵyndardy óteıdi. Máselen, bir patsıentte KVI-diń jeńil dárejesin emdeý 292,6 myń teńgeni, ortasha - 446,1 myń teńgeni, aýyr - 1,5 mln teńgeni quraıdy. Óte aýyr dárejedegi syrqatty emdegeni úshin Qor 1,7 mln teńge tóleıdi», - deıdi Larısa Gordeeva.

Budan basqa mobıldi brıgadalardyń jumysyn da qarjylandyrady. Qazirdiń ózinde óńirde, densaýlyq saqtaý basqarmasynyń málimetinshe, osyndaı 96 brıgada emhanalar men aýdandyq aýrýhanalarda jumys isteıdi. Olardyń naýqasqa bir baryp-kelgen 5400 teńge turady eken.

Medıtsınalyq qyzmetkerlerge ústemeaqy tóleý úshin respýblıkalyq bıýdjet esebinen óńirge 983 mln teńge bólindi. Naýryzdan maýsymǵa deıingi kezeńde Qor qarjy operatory retinde medıtsına qyzmetkerleriniń jalaqysyna qosymsha 570 mln teńgeden astam qarjy tóledi. Eger naýryzda 493 qyzmetker ústemeaqy alsa, maýsym aıynda olardyń sany 1 491 adamǵa deıin ósken.